İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 139 Hüküm no: 106 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Tütüncü Serkiz v. Kaspar’ın borcunu ödemesi için hapisten çıkarılmasına müsaade edildiği Mahbûsdan ihrâc Ma‘rûz[-ı dâ‘î-i devlet-i aliyyeleridir ki] İşbu arzuhâl hâmişinde mastûr iki kıt‘a i‘lâm-ı şer‘î mantûkunca Mehmed Ağa b. Abdullah’a üç bin yüz elli guruş ve Tütüncü Parsah v. Ohan zimmîye iki bin yüz doksan guruş deynleri içün sene-i sâbıkā Recebinden berü Bâb-ı âlide tomrukda mahbûs olan sâhib-i arzuhâl İznikmidî Tütüncü Serkiz v. Kaspar zimmî meclis-i şer‘-i münîrde dâyinleri merkūmân muvâcehelerinde meblağayn-ı mezkûreyni benden tahsîl içün târih-i mezkûrdan berü ben mahbûs olup lâkin yanımda ism-i mâl ıtlâk olunur nesnem olmayup meblağayn-ı mezkûreyne vâfî mâlım olan tütün ve tonbâki ve sâir emti‘am medîne-i İznikmid’de dükkânımda mevcûd olarak dükkânım südud kalıp ve telef ihtimâli olmağla dâyinlerim merkūmânım bana mübâşir ta‘yîn eyledikleri Kapıkethüdâsı Mehmed Ağa benimle medîne-i merkūmeye varup dükkânımda mevcûd mâlım ma‘rifet-i şer‘le bana teslîm-birle Der-aliyye’ye avdetime mahallinde mümâna‘at olunmamak bâbında fermân-ı âlîşân sudûru niyâzımdır deyip ve dâyinleri merkūmân dahi meclis-i şer‘de bu vechile râzılar olarak ruhsat vermeleriyle ol vechile emr-i âlîşân ısdârı menût-ı re’y-i sâmî idüğü İstanbul Mahkemesi’nden huzûr [-ı âlîlerine i‘lâm olundu.] Fî 11 M sene 1237