İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 152 Hüküm no: 119 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi, Nikola ve Todori’nin, bahçıvan esnafına müdahale etmeyeceklerini taahhüt ettikleri Bostan gediğinden men‘ Ma‘rûz[-ı dâ‘î-i devlet-i aliyyeleridir ki] Ashâb-ı arzuhâl Âsitâne-i aliyye ve tevâbi‘inde vâki‘ bahçıvan esnâfının bâ-berât-ı âlîşân kethüdâsı es-Seyyid Süleyman Ağa ve kethüdâ vekîli İsmail Ağa ve yiğitbaşısı Hasan Usta ve Mustafa Usta ve bahçıvan tâifesinden Yani ve Kiryako ve Nikola ve diğer Yani ve Yorgi ve Niyako ve Dimo ve Metro ve Kosta ve Hristo ve Aleksi ve Dimitri ve sâirleri meclis-i şer‘-i münîrde arzuhâlde isimleri mastûr dülger kalfalarından Yorgi ve Nikola ve Todori evlâd-ı Dimo zimmîler muvâcehelerinde İstanbul’da Yenibahçe kurbünde Karabaş Mahallesinde vâki‘ Çavuş Bostanı demekle ma‘lûm bir kıt‘a bostan derûnunda mevcûde gedik âlât-ı lâzımesi zimmîyyûn-ı mersûmûnun mâlları ve kendileri dülger kalfaları olup esnâfımızdan hâric olduklarından âlât-ı gedik-i mezkûru esnâfımızdan olanlara îcâr eylediklerinden mersûmûnun umûrumuza müdâhaleleri iktizâ etmez iken bizim gerek cânib-i Tersâne-i âmireye veregeldiğimiz akçeyi ve gerek âhar husûslar içün ber-mu‘tâd olan masrûfumuzu kadîmden olageldiği üzere bahçıvan esnâfına beynimiz[de] tevzî‘ ve mersûmûnun müstecirleri hisselerine isâbet eden meblağı müstecirlerinden mutâlebe eylediğimizde mersûmûn Yorgi ve Nikola ve Todori zimmîler biz müstecirlerimizin tersâne akçesinden mâ‘adâ bir akçe verdiklerine râzı değilleriz deyü cümlemiz muhâlefet ve umûr-ı sâiremize müdâhale ederler deyü mersûmûndan teşekkî ve umûr-ı esnâfa müdâhale etmemeleri bâbında emr-i âlî sudûru niyâzında olduğumuzda mersûmûn Yorgi ve Todori ve Nikola zimmîler fîmâ ba‘d müstecirlerinden âlât-ı gedik-i mezkûrun fakat kirâsını alıp kendi kesbleriyle meşgūl olmağla ve esnâfımız umûruna vechen mine’l-vücûh müdâhale etmemeğe her biri ta‘ahhüd edüp bu vechile bizi irzâ ve iskāt etmişlerdir dedikleri mersûmûn Yorgi ve Nikola ve Todori zimmîler tasdîk edüp bu vechile kat‘-ı nizâ‘ eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 24 M sene 1237