İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 151 Hüküm no: 118 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız İbrahim Efendi b. Ahmed’in, Kirkor v. Karabet’e olan borcunu ödemesi gerektiği Nemâdan bilâ-devr iki bin sekiz yüz guruş hüküm Ma‘rûz[-ı dâ‘î-i devlet-i aliyyeleridir ki] Sarraf tâifesinden arzuhâl eden Kirkor v. Karabet nâm zimmî meclis-i şer‘-i münîrde Anadolu kuzâtından arzuhâlde ismi mezkûr Karahisârî Hâfız el-Hâc İbrahim Efendi b. Ahmed nâm kimesne mahzarında merkūm Hâfız el-Hâc İbrahim Efendi zimmetinde cihet-i karz-ı şer‘îden üç bin yedi yüz seksen guruş alacak hakkım olup hatta meblağ-ı merkūm cihet-i mezkûreden zimmetinde bana deyni olduğunu merkūm Hâfız el-Hâc İbrahim Efendi bin iki yüz otuz üç senesi Cemâziyelevvelinin yirmi üçüncü günü ikrâr ve târih-i merkūm ile müverrah yedime bir kıt‘a deyn temessükü dahi i‘tâ ettikden sonra sene-i mezkûre Şa‘bânının yirmi üçüncü günü dahi yedimden ve mâlımdan bilâ-temessük karz aldığı yüz elli guruş ki cem‘an üç bin sekiz yüz yetmiş sekiz guruş matlûbumun beş yüz guruşunu bana edâ ve teslîm etmek bâkīsi olan üç bin üç yüz yetmiş sekiz guruşu bana edâ ve teslîme merkūm el-Hâc Hâfız İbrahim Efendi’ye tenbîh olunması murâdımdır deyü da‘vâ ettikte ol dahi cevâbında müdde‘î-i mersûmun yedine üç bin yedi yüz yirmi sekiz guruş deyn ikrârını nâtık temessük-ı mezkûru verdiğini ikrâr lâkin meblağ-ı mezbûrun ancak bin altı yüz elli guruş karz olup mâ‘adâ iki bin yetmiş sekiz guruşu bilâ-devr-i şer‘î ribâ olmağla karz-ı mezkûr bin altı yüz elli guruşdan müdde‘î-i mersûmun kabzını mu‘terif olduğu meblağ-ı mezkûr beş yüz guruş fürû-nihâde olundukta müdde‘î-i mersûma zimmetinde ancak bin yüz elli guruş deynim kalmışdır deyü müdde‘î-i mersûmun inkârına mukārin ve müdde‘î-i mersûmun hâric ez temessük ziyâde yüz elli guruş karz müdde‘âsını dahi ba‘de’l-inkâr tarafeynin ziyâde karz ve ribâ müdde‘âları beyâna ba‘de’l-havâle def‘a-i sânîye murâfa‘larında müdde‘î-i mersûm hâric ez temessük ziyâde yüz elli guruş karz müdde‘âsına ityân-ı beyyineden izhâr-ı acz edüp talebiyle merkūm el-Hâc Hâfız İbrahim Efendi’ye dahi ber-vech-i muharrer bi’l-muvâcehe yemîn verilmekle müdde‘î-i mersûm meblağ-ı mezkûr yüz elli guruş mutâlebesiyle mezbûr el-Hâc Hâfız İbrahim Efendi’ye bilâ-beyyine mu‘âraza[dan] men‘ olunup merkūm el-Hâc Hâfız İbrahim Efendi dahi ber-vech-i muharrer iki bin yetmiş sekiz guruş ribâ da‘vâsını beyândan âciz olup mersûm Kirkor zimmî istihlâf ettiği hînde müdde‘î-i mersûm Kirkor zimmî temessük-ı mezkûr mûcebince merkūm el-Hâc Hâfız İbrahim Efendi’den matlûbu olan meblağ-ı mezbûr üç bin yedi yüz yirmi sekiz guruşun ancak dört yüz yirmi sekiz guruşu bilâ-devr-i şer‘î olduğunu ba‘de’l-ikrâr ol vechile ribâ olduğu ikrârıyla zâhir olan meblağ-ı mezkûr dört yüz yirmi sekiz guruş ve bâlâda beyân olunduğu üzere merkūm el-Hâc Hâfız İbrahim Efendi’den kabzını mutasarrıf olduğu meblağ-ı mezkûr beş yüz guruş ki cem‘an dokuz yüz yirmi sekiz guruş matlûb-ı mezkûru olan üç bin yedi yüz yirmi sekiz guruşdan fürû-nihâde ve tenzîl-birle bâkīsi olan iki bin sekiz yüz guruşdan merkūm el-Hâc Hâfız İbrahim Efendi’nin bilâ-devr ziyâde ribâ olduğunu iddi‘â eylediği bin altı yüz elli guruş hakkında mersûm Kirkor zimmîye dahi bi’l-muvâcehe yemîn verilmeğin mûcebiyle merkūm el-Hâc Hâfız İbrahim Efendi ber-minvâl-i muharrer ziyâde bin altı yüz elli guruş bilâ-devr ribâ da‘vâsıyla müdde‘î-i mersûma bilâ-beyyine mu‘ârazadan ba‘de’l-men‘ ikrâr u i‘tirâf mûcebiyle lâzım gelen meblağ-ı bâkī-i mezkûr iki bin sekiz yüz guruşun bi’t-taleb müdde‘î-i mersûma edâsıyla merkūm el-Hâc Hâfız İbrahim Efendi ilzâm olunduğu huzûr [-ı âlîlerine i‘lâm olundu.] Fî 22 M sene 1237