İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 154 Hüküm no: 121 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Salih Ağa’nın, ipekçi dükkânı gediğini Şerîfe Fâtıma Âkıle Hanım’a sattığı Kazzâz gediği mübâya‘ası Ma‘rûz-ı dâ‘î-i devlet-i aliyyeleridir ki İstanbul hısnı ebvâbından Balatkapısı dâhilinde Kesmekaya kurbünde Hammamî Muhyiddin Mahallesi’nde sâkin iken bundan akdem vefât eden kazzâz esnâfından Mehmed Ağa b. el-Hâc Hasan b. Süleyman’ın verâseti zevce-i menkûha-i metrûkesi Şerîfe Fâtıma Âkıle Hanım bt. es-Seyyid Mehmed ile zevce-i mezbûreden mütevellideler sulbiye sagīre kızları Şerîfe Emine ve Şerîfe Gānime ve Şerîfe Âişe Hanımlar ve zevce-i uhrâsı müteveffât Nefîse Hatun bt. İbrahim’den mütevellide sulbiye kebîre kızı Hadice Hanım ve li-ebeveyn ammioğlu es-Seyyid Mehmed Ağa b. es-Seyyid Hüseyin’e ba‘de’l-inhisâr müteveffâ-i mezbûrun sülüs mâlını vesâyâ-yı mu‘ayyene ve gayr-ı mu‘ayyenesine tenfîze ve sagīrât-ı mezbûrâtın tesviye-i emirlerine bâ-hüccet-i şer‘iyye vasiyy-i muhtâreleri olup zâtı ta‘rîf-ı şer‘î ile mu‘arrefe olan zevce-i mezbûre Şerîfe Fâtıma Âkıle Hanım asâleten ve vesâyeten ve mezbûre Hadice Hanım’ın hâlâ zevci ve tarafından husûs-ı âtîde vekîl-i sâbitü’l-vekâlesi Humbaracı Mehmed Ağa b. el-Hâc Mustafa vekâleten ve mezbûr es-Seyyid Mehmed Ağa asâleten meclis-i şer‘-i münîrde Mehmed Salih Ağa b. Mehmed mahzarında kazzâz esnâfının kethüdâları Abdüllatif Ağa hâzır olduğu hâlde her biri bi’l-asâle ve bi’l-vesâye ve bi’l-vekâle takrîr-i kelâm edüp İstanbul’da Çarşı-yı Kebîr’de Kebeciler Hanı civârında kâin ma‘lûmü’l-hudûd iki kepenk bir bâb kazzâz dükkânı derûnunda mevcûde beyne’l-esnâf bir gedik tâ‘bir olunur bâ-defter-i müfredât âlât-ı lâzıme-i ma‘lûme bâ-sûret müstakillen müteveffâ-i mezbûrun yedinde mâlı ve mülkü olup ba‘de vefâtihi bize ve verese-i sâire-i mezkûresine mevrûs ve sülüs vesâyâsına isâbet etmekle âlât-ı lâzıme-i ma‘lûmeyi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile lede’l-müzâyede ve inkıtâ‘u’r-rağbe el-yevm semen-i misli idüğü ihbâr olunan altı bin beş yüz guruşa mezbûr Mehmed Salih Ağa’ya bi’l-asâle ve bi’l-vesâye ve bi’l-vekâle bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl edüp semeni olan meblağ-ı merkūm altı bin beş yüz guruşu mezbûr Mehmed Salih Ağa bize tamamen def‘ ve teslîm biz dahi yedinden bi’l-asâle ve bi’l-vesâye ve bi’l-vekâle bi’t-tamam ve’l-kemâl ahz ü kabz ve müteveffâ-i mezbûrun defter-i kassâmına idhâl eyledik fîmâ ba‘d zikr olunan gedik âlât-ı lâzımesinde bizim ve sagīrât-ı mezbûrâtın ve müvekkile-i mezbûre Hadice Hanım’ın aslâ alâka ve medhallerimiz kalmayup mezbûr Mehmed Salih Ağa’nın mâl-ı müşterâsı ve hakk-ı sırfı olmuşdur dediklerini müşteri-i merkūm ba‘de’t-tasdîk müşteri-i mezbûr Mehmed Salih Ağa meclis-i şer‘-i münîrde merkūme Şerîfe Fâtıma Âkıle Hanım mahzarında takrîr-i kelâm edüp ben dahi bâlâda zikr olunan minvâl üzere şirâen mâlik olduğum âlât-ı lâzıme-i muharrere-i mezkûreyi tarafından bi’l-îcâb ve’l-kabûl bâtten ve sahîhan bi-safkatin vâhidetin mezbûre Şerîfe Fâtıma Âkıle Hanım’a altı bin beş yüz guruş semen-i medfû‘ ve makbûza bey‘ ve temlîk eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp fîmâ ba‘d âlât-ı lâzıme-i muharrere-i mezkûrede benim aslâ ve kat‘â alâka ve medhalim kalmayup mezbûre Şerîfe Fâtıma Âkıle Hanım’ın müstakillen mâlı ve mülkü ve hakk-ı sırfı olmuşdur deyü ba‘de’l-ikrâr ve’t-tasdîk zikr olunan gedik-i merkūm kaleminde müteveffâ-i mezbûr Mehmed Ağa’nın ismine olan kaydı ref‘ ve terkīn ve sûret-i atîki kaleminde hıfz-birle mezbûre Şerîfe Fâtıma Âkıle Hanım’ın ismine tashîhan kayd ve yedine müceddeden bir kıt‘a sûret i‘tâ olunması mezbûre Şerîfe Fâtıma Âkıle Hanım istid‘â ve istirhâm eylediği İstanbul Mahkemesi’nden huzûr [-ı âlîlerine i‘lâm olundu.] Fî 2 M sene 1237