İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 155 Hüküm no: 122 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerkez asıllı köle Hasan’ın hürriyetini ispat edemediği Rıkkıyetde ibkā Ma‘rûz[-ı dâ‘î-i devlet-i aliyyeleridir ki] Ber-vech-i âtî rıkka inkıyâd-ı sâbıkını mukır ve mu‘terif olmağla da‘vâya dahi kıbel-i şer‘den me’zûn olan sâhib-i arzuhâl Hasan meclis-i şer‘-i münîrde rık olmak üzere kendüye vâzı‘u’l-yed olunan derûn-ı arzuhâlde mezkûrü’l-ism Esirci Ahmed Beşe [b.] el-Hâc Nureddin mahzarında ben Çerkes diyârından Hatofiş kasabası ahâlîsinden hürrü’l-asl olan Haturak nâm kimesnenin firâşından hâsıl ve zevcesi kezâlik hürrü’l-asl olan Melek Hatun’dan mütevellid hürrü’l-asl olup bana ve ebeveynim mezbûrâna kat‘â rıktârî olmamak manasına ben hürrü’l-asl iken merkūm Ahmed Beşe rık olmak üzere bi-gayr-ı hak bana vaz‘-ı yed etmekle suâl olunup sebîlim tahliye olunmak matlûbumdur deyü da‘vâ ettikte ol dahi cevâbında müdde‘î-i merkūmu Çerkes cinsinden rık olmak üzere Pedez nâm mirzâdan müdde‘î-i merkūm ile gāib ani’l-meclis Mehmed’i safka-i vâhide ile dört bin guruş semen-i medfû‘ ve makbûza iştirâ ve kabz edüp ol vechile yedimde şirâen abd-i memlûküm olmağla vaz‘-ı yed ederim deyü ber-vech-i muharrer hürriyet-i asliye müdde‘âsını külliyen inkâr etmekle müdde‘î-i mezbûr ber-vech-i muharrer hürriyet-i asliye müdde‘âsını isbâtdan külliyen acz ve ızhâr edüp mezbûr Ahmed Beşe’yi tahlîfe dahi tâlib olmamağın mûcebiyle müdde‘î-i merkūm da‘vâ-yı mezkûresiyle mezbûr Ahmed Beşe’ye bilâ-beyyine muârazadan ba‘de’l-men ke’l-evvel merkūm Esirci Ahmed Beşe’ye rık olmak üzere inkıyâda mezbûr Hasan’a tenbîh olunduğu İstanbul Mahkemesi’nden huzûr [-ı âlîlerine i‘lâm olundu.] Fî 24 M sene 1237