İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 157 Hüküm no: 126 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyveli aşiretinin Anadolu’dan İstanbul’a getirdiği koyun ve keçilerin kasap esnafına dağıtımı Yine Âsitâne-i aliyyeye ağnâm tevzî‘i Ma‘rûz[-ı dâ‘î-i devlet-i aliyyeleridir ki] Anadolu’da Zeyveli aşîretinden olup bu def‘a dahi Der-aliyye’ye cem‘an on sekiz bin yedi yüz elli re’s karaman ağnâmı ve keçi sevk ve tesyîr eden celeb tâifesinden bin dört yüz re’s karaman ağnâmının mâliki Hacı Osman oğlu Hacı İbiş ve altı yüz re’s ganemin mâliki Veli Hüseyin ve sekiz yüz re’s ganemin mâliki Kara Hasan ve beş yüz re’s ganemin mâliki Yusuf Ağa ve üç yüz re’s ganemin mâliki Hacı Bekir oğlu Arab Osman ve dört yüz re’s ganemin mâliki Danabaş oğlu Ömer ve bin re’s ganemin mâliki Sâğır Ömer ve altı yüz re’s ganemin mâliki Hacı Ebûbekir Ağa ve yine dört yüz re’s ganemin mâliki mezbûr Hacı Ebûbekir Ağa ve dört yüz elli re’s ganemin mâliki Hacı Ahmed Ağa ve beş yüz elli re’s ganemin mâliki Ebûbekir Ağa ve yedi yüz re’s ganemin mâliki Kalender oğlu İsmail ve yine yedi yüz re’s ganemin mâliki mezbûr İsmail ve sekiz yüz elli re’s ganemin mâliki Hacı Hasan Ağa ve yedi yüz elli re’s ganemin mâliki Otuzbir Mehmed Ağa ve yedi yüz re’s ganemin [mâliki] Kara Hacı Mustafa ve beş yüz elli re’s ganemin mâliki Danabaş oğlu Hacı Hüseyin ve altı yüz re’s ganemin mâliki Hacı Bekir oğlu Ali ve iki yüz elli re’s ganemin mâliki Veli Hüseyin oğlu Hüseyin ve dört yüz re’s ganemim mâliki Öksüzoğlu Musa ve beş yüz re’s ganemin mâliki Resul oğlu Osman ve üç yüz re’s ganemin mâliki Çinici Ali ve üç yüz re’s ganemin mâliki Kangırılı Baba Sokmaz Yusuf ve dört yüz seksen re’s ganemin mâliki Kangırılı diğer Yusuf ve dört yüz re’s ganemin mâliki Atçekenli Hasan ve yine altı yüz re’s keçinin mâliki mezbûr Hasan ve bin re’s ganemin mâliki Atçekenli Salih Bey ve yine iki yüz re’s keçinin mâliki mezbûr Salih Bey ve iki bin re’s ganemin mâliki Ömer Bey ve yine iki yüz re’s keçinin mâliki Ömer Bey’den her biri meclis-i şer‘-i münîrde kassabân ustalarından es-Seyyid Hasan Efendi ve el-Hâc İbrahim Ağa ve Mercanlı el-Hâc Ali Ağa ve Mimarlı Mehmed Ağa ve Eğrikapu Kethüdâsı el-Hâc Osman Efendi ve Edirnekapılı İbrahim Ağa ve Topkapılı Mustafa Ağa ve sâirleri hâzır oldukları hâlde kassabân esnâfının kethüdâsı el-Hâc Hasan Ağa b. el-Hâc Osman mahzarında her biri takrîr-i kelâm edüp ber-vech-i muharrer mâlikleri olduklarımız hayvânât-ı mezkûreyi bundan akdemce bâ-fermân-ı âlî verilen nizâm üzere lühûmunun beher kıyyesini kassabân esnâfına otuz yedi para ve kuyruklarının kırk para ve ağnâm sakatlarını on para ve keçi sakatlarını beş para i‘tibâriyle ber-mûceb-i nizâm bu sene celebleri ağnâmını dört gün ve bizim ağnâmımızı sekiz gün kassabân esnâfına tevzî‘ içün kethüdâ-yı merkūm el-Hâc Hasan Ağa’ya teslîme ve kethüdâ-yı merkūm dahi ağnâm-ı mezkûrenin mikdâr ve semenlerini mübeyyin yaftalarını hîn-i tevzî‘inden yirmi bir gün mürûrunda ve akçelerini hîn-i tevzî‘inden otuz bir gün mürûrunda esnâfından cem‘ ve tahsîl-birle bize tamamen îfâya ve lühûmunun beher kıyyesini narh-ı cârî üzere kırk paraya ve kuyruğunun beher kıyyesini kırk üçer paraya ibâdullâha bey‘e hâlâ hâssa kasabbaşısı efendi hazretlerinin inzı[mâ]m-ı re’yiyle ta‘ahhüd ve tarafeynden her birimiz âharın ta‘ahhüdlerini kabûl eyledik dediklerini kethüdâ-yı merkūm ba‘de’t-tasdîk ber-mûceb-i nizâm tevzî‘e ta‘ahhüd eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 17 M sene 1237