İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 159 Hüküm no: 129 Orijinal metin no: [26b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki fesçi esnafının fiyat nizamı Fescilerinin fiyat nizâmı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ fesci esnâfının kethüdâsı Kasım Ağa ve baş ihtiyârları Süleyman Ağa ve ihtiyârlarından Şa‘bân Ağa ve Salih Ağa ve Ahmed Ağa ve el-Hâc Salih Ağa ve Osman ve diğer Salih Ağa ve yiğitbaşı es-Seyyid Hasan Hoca ve Çavuş Mehmed Ağa ve Galata Kethüdâsı el-Hâc İsmail Ferhad Ağa ve başihtiyâr el-Hâc Süleyman Ağa ve Kasım Ağa ve Süleyman Ağa ve el-Hâc Yahya Ağa ve Ömer Ağa ve Yiğitbaşı es-Seyyid Mustafa ve sâir mazbûtü’l-esâmî kimesneler meclis-i şer‘-i münîrde her biri takrîr-i kelâm ve ifâde-i merâm edüp yedimizde olup bâlâsı Hüdâvendigâr-ı esbak cennet-mekân merhûm ve mağfiret-nişan Sultan Mahmud Hân hazretlerinin tuğra-yı garrâlarıyla muvaşşah bir kıt‘a fermân-ı âlîşân mantûkunca kadîmden Mağrib diyârından esnâfımızdan olmayan tüccârı ma‘rifetiyle gelen fes ve şal ve kuşak ve ihrâm kethüdâ ve ihtiyârlarımız ve yiğitbaşılarımız ma‘rifetleriyle tevzî‘ ve taksîm ve bir ferde gadr olmayup hilâf-ı emr-i âlî hareket memnû‘ ve bu nizâ[m] bu eyyâma değin beynimizde mer‘î ve mu‘teber iken esnâfımızdan ba‘zı kendiyü bilmez kimesneler ba‘zı hâricden olan Müslim ve Rum ve Ermeni ve Yahûdi tâifesiyle bi’l-ittifâk nizâm-ı mezkûrumuza adem-i ri‘âyete ictisâr ile Efrenc diyârında i‘mâl olunup Der-aliyye’ye ve sâir emti‘a götüren efrenc tüccârına diyâr-ı Mağrib’de i‘mâl olunan feslere mevzû nişanlarımızın resmini ta‘lîm ile Efrenc diyârında i‘mâl olunan fese bize mahsûs nişanları resm ettirdüb dükkânlarına revaç içün külliyen tevzî‘i kat‘ ve başlı başlarına buldukları mahallerden o makūle diyâr-ı Mağrib [27a] nişanlı Efrenc feshi mahallinden celb edenlerden her ne kadar râyici ile olur ise de gezdirdikleri mahallerde fark edemeyenlere taşralılara Mağrib fesi diyerek gālî bahâ ile füruht etmeleri ihtilâl-i nizâm-ı kadîm-i mer‘iyyemize bâdî ve ibâdullâha mazarrâtı mûceb olmağla bi’d-defa‘ât beynimizde münâza‘a vukū‘una bâ‘is olmuş idi el-hâletü hâzihî beynimiz ıslâh olunup ba‘de’l-yevm kadîmden olageldiği vechile diyâr-ı Mağrib’den tevârüd eden envâ‘-ı fes ile Efrenc diyârından gelen fesci emti‘asını bi’l-cümle fesci esnâfı kethüdâ ve ihtiyârları ve yiğitbaşılar tüccârı yedinde görüp fiyatını bi’t-terâzî kat‘ ettikden sonra ber-mu‘tâd kethüdâ ve ihtiyâr ve yiğitbaşılar lonca odasında alâ-hâlihim esnâfına tevzî‘ edüp esnâf dahi dükkânlarına ba‘de’l-vaz‘ her bir vakitde Mağrib ve Efrenc feslerine ta‘yîn olunan fiyat üzere Mağrib fesini cinsini ifâde ederek Mağrib fesine vaz‘ olunan fiyatla ve Efrenc fesini dahi Efrenc fesi olduğunu beyân ederek fiyat-ı mevzû‘asıyla ibâdullâha bey‘e cümlemiz kavl ve ittifâk edüp fîmâ ba‘d esnâfımızdan bir ferd efrenc fesini ibâdullâha Mağrib fesi olmak bey‘ etmemelerine cümleten kethüdâ ve ihtiyârlarımız ve yiğitbaşılarımız nezâret edüp ve ederi olur ise tedîbât-ı lâyıkaları icrâsı içün hükkâm-ı kirâma ifâdeye müte‘ahhidler olmamızla fîmâ ba‘d bu makūle Efrenc diyârından vürûd eden Mağaribe nişanlu fes Mağrib feshi olmak ibâdullâha füruht olunması memnû‘ olup esnâfımızdan fes bey‘ edenler râyici üzere Mağrib fesini fiyat-ı mevzû‘asıyla ve Efrenc fesini yine fiyat-ı mevzû‘asıyla cinsini ifâde ederek tâlibine bey‘ edüp ve hilâfına hareket ederleri olur ise tedîb olunmak ve kadîmden olageldiği vechile tüccârdan alınan envâ‘-ı fes ber-mu‘tâ[d] lonca odasında kethüdâ ve ihtiyârlar ve yiğitbaşılar ma‘rifetleriyle esnafımızın Âsitâne-i aliyyeye ve Galata dekâkîni olan bâ-fermân-ı âlî mu‘teber seksen beş aded gedik ve sergi ve tobracı hisseler üzere tevzî‘ olunup bir ferde gadr olunmamak bâbında mukaddemâ verilen emr-i âlinin tekîdini hâvî bu def‘a dahi yedlerine emr-i âlîşân sadaka ve ihsân buyrulması niyâzında oldukları İstanbul Mahkemesi’nden huzûr [-ı âlîlerine i‘lâm olundu.] Fî 25 M sene 1237