İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 163 Hüküm no: 132 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Begos v. Agob’un, Rüstempaşa vakfından icareli odayı Sarraf Mikail v. Agob’a sattığı Bin beş yüz guruşa oda mübâya‘ası aded 1 Ma‘rûz[-ı dâ‘î-i devlet-i aliyyeleridir ki] Sarraf tâifesinden Begos v. Agob nâm zimmî meclis-i şer‘-i münîrde bâ‘isü’l-i‘lâm Sarraf Mikail v. diğer Agob nâm zimmî muvâcehesinde takrîr-i kelâm edüp İstanbul’da Mahmud Paşa Câmi‘-i şerîfi kurbünde müteveffâ Rüstempaşa Evkāfı müsakkafâtından Sultan Odaları demekle ma‘rûf bir bâb hanın tahtânîsinde sol tarafda kâin on birinci bir bâb oda derûnunda mevcûde ve başmuhâsebede mukayyed gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Sarraf Mikail zimmîye bin beş yüz guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimizin âharın [zimmetini] ibrâ-i âm ile kabûlü hâvî ibrâ ve iskāt etmemizle ba‘de’l-yevm âlât-ı lâzıme-i ma‘lûmede benim aslâ ve kat‘an alâka ve medhalim kalmayup mersûm Mikail zimmînin mülk-i müşterâsı olmuşdur deyü ba‘de’l-ikrâr ve’t-tasdîk mersûm Sarraf [27b] Mikail zimmî âlât-ı lâzıme-i mezkûrenin kaleminde mesfûr Sarraf Begos zimmî üzerine olan kayd-ı atîki ref‘ ve terkīn-birle bu def‘a kendi ismine kayd ile yedine müceddeden kayd i‘tâsı niyâzında olmağın bu makūle kalemde mukayyed oda gediği âlât-ı lâzıme-i ma‘lûmeleri bey‘ olundukta bâyi‘in ismine olan kaydı ref‘ ve terkīn-birle müşteri ismine kayd ve yedine müceddeden bir kıt‘a sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 5 S sene 1237