İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 163 Hüküm no: 133 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebete bt. Sahak’ın, tuhafiyeci dükkânı gediğini Manil v. Sekyas’a sattığı Tuhafcı mübâya‘ası gediği 2.000 Ma‘rûz[-ı dâ‘î-i devlet-i aliyyeleridir ki] İstanbul’da Kumkapı kurbünde İncirdibi nâm mahalde Karabıçak sokağında mütemekkine Uncu Baron zevcesi Ebete bt. Sahak nâm Nasrâniye tarafından husûs-ı âtîde ikrâra vekîl olduğu şahsını bilür Fincancı Mardros v. Zakar ve Fincancı Avanes v. Kocasar nâm zimmîler şehâdetleriyle sâbit olan Fincancı Karabet v. Begos nâm zimmî meclis-i şer‘-i münîrde bâ‘isü’l-i‘lâm tuhafcı ve fincancı Manil v. Sekyas nâm zimmî muvâcehesinde bi’l-vekâle takrîr-i kelâm edüp müvekkilem mesfûre Ate Nasrâniye İstanbul’da Sultan Bâyezid kolluğu tahtında çeşme sırasında Asvadi zimmî dükkânına muttasıl bir bâb tuhafcı dükkânı derûnunda mevcûde başmuhâsebede mukayyed gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakilleten yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Manil zimmîye iki bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini ibrâ-i âmm ile kabûlü hâvî ibrâ ve iskāt etmemizle ba‘de’l-yevm âlât-ı lâzıme-i ma‘lûmede benim aslâ ve kat‘â alâka ve medhalim kalmayup mersûm Manil zimmînin mülk-i müşterâsı olmuşdur dedi deyü bi’l-vekâle eylediği takrîrini mersûm zimmî ba‘de’t-tasdîk mersûm Manil zimmî âlât-ı lâzıme-i mezkûrenin kaleminde müvekkile-i mesfûre Ate Nasrâniye üzerine olan kayd-ı atîki ref‘ ve terkīn-birle bu def‘a kendi ismine kayd ile yedine müceddeden sûret i‘tâsı niyâzında olmağın bu makūle kalemde mukayyed gedik âlât-ı lâzımeleri bey‘ olundukta bâyi‘in ismine olan kaydı ref‘ ve terkīn-birle müşteri ismine kayd ve yedine müceddeden bir kıt‘a sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 5 S sene 1237