İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 165 Hüküm no: 135 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurum’dan İstanbul’a getirilen koyunların kasap esnafına dağıtımı Bu def‘a Der-aliyye’ye gelen ağnâm tevzî‘i Ma‘rûz[-ı dâ‘î-i devlet-i aliyyeleridir ki] Erzurum tarafından Der-aliyye’ye cem‘an on bir bin yüz re’s Karaman ağnâmı sevk ve tesyîr eden celeb tâifesinden sekiz yüz re’s Karaman ağnâmının mâliki Abdülgafur Bey ve altı yüz elli re’s ganemin mâliki Ali Bey ve altı yüz re’s ganemin mâliki Resul Bey ve dokuz yüz re’s ganemin mâliki Memiş Bey ve def‘a dokuz yüz re’s ganemin mâliki mezbûr Memiş Bey ve def‘a dokuz yüz re’s ganemin mâliki mezbûr Memiş Bey ve def‘a sekiz yüz re’s ganemin mâliki mezbûr Memiş Bey ve def‘a sekiz yüz re’s ganemin mâliki mezbûr Memiş Bey ve dokuz yüz re’s ganemin mâliki diğer Ali Bey ve dokuz yüz re’s ganemin mâliki Süleyman Bey ve sekiz yüz elli re’s ganemin mâliki Ahmed Bey ve dokuz yüz elli re’s ganemin mâliki diğer Süleyman Bey ve dokuz yüz re’s ganemin mâliki Ebûbekir Bey ve üç yüz re’s ganemin mâliki Mehmed Bey’den her biri meclis-i şer‘-i münîrde kasab ustalarından Eğrikapı kethüdâsı es-Seyyid el-Hâc Osman Efendi ve Edirnekapılı İbrahim Ağa ve Topkapılı Mustafa Ağa ve Eyüblü Molla Feyzullah ve Hasköylü Mehmed Ağa ve es-Seyyid el-Hâc İbrahim Ağa ve es-Seyyid Hasan Efendi ve Mimarlı Mehmed Ağa ve Mercanlı el-Hâc Ali ve diğer Mimarlı Mehmed Ağa ve sâirleri hâzır oldukları hâlde kassabân esnâfının kethüdâsı el-Hâc Hasan Ağa b. el-Hâc Osman mahzarında her biri takrîr-i kelâm edüp biz ber-vech-i muharrer mâlikleri olduklarımız hayvânât-ı mezkûreyi bundan akdemce bâ-fermân-ı âlî verilen nizâm üzere lühûmunun beher kıyyesini kassabân esnâfına otuz yedi para ve kuyruklarının beher kıyyesini elli para ve ağnâm sakatlarını on para ve keçi sakatlarını beşer para i‘tibâriyle ber-mûceb-i nizâm bu sene celebleri dört gün ve bizim ağnâmımızı sekiz gün kassabân esnâfına tevzî‘ ve ağnâm-ı mezkûrenin mikdâr ve semenlerini mübeyyin yaftalarını hîn-i tevzî‘den otuz bir gün mürûrunda bize teslîme kethüdâ-yı merkūm ve akçelerini hîn-i tevzî‘den elli bir gün mürûrunda bize tamamen îfâya ve lühûmun beher kıyyesini narh-ı cârî üzere kırkar paraya ve kuyruğun beher kıyyesini elli üçer paraya ibâdullâha bey‘e hâlâ hâssa kasabbaşısı efendi hazretlerinin inzımâm-ı re’y ile esnâf-ı merkūmûn ta‘ahhüd ve tarafeynden her birimiz âharın ta‘ahhüdünü kabûl eyledik dediklerini kethüdâ-yı merkūm ba‘de’t-tasdîk ber-mûceb-i nizâm tevzî‘e ta‘ahhüd eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 5 S sene 1237