İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 164 Hüküm no: 134 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firari Apanozlu Yorgaki’nin dükkânındaki malların devlet tarafından zapt edildiği Firâri-i mersûmun emvâlini cânib-i mîrîden zabt Ma‘rûz[-ı dâ‘î-i devlet-i aliyyeleridir ki] Sâdır olan fermân-ı şerîflerine imtisâlen hâlâ İstanbul Balkapanı nâzırı es-Seyyid el-Hâc Ahmed Ağa ve tüccârından el-Hâc Mahmud Ağa ve nâzır-ı sâbık el-Hâc Feyzullah Ağa ve el-Hâc Mehmed Ağa ve el-Hâc Abdulkādir Efendi ve Mehmed Râşid Ağa ve Alemdâr Mehmed Ağa ve kapan-ı mezkûr Bölükhamalı Kara Alemdâr ve diğer Bölükhamalı Salih Alemdâr İstanbul mahkemesinde meclis-i şer‘de kapan-ı mezkûr nâibi efendi dâ‘îleri hâzır olduğu hâlde işbu arzuhâl ve derkenârda mezkûr kâffe-i emvâli cânib-i mîrîden zabt olunan kapan-ı merkūm tüccârından firâri Apanozlu Yorgaki nâm hâinin kapan-ı merkūmda iki yüz yirmi iki yedek don ve çerviş yağı vardır deyü mukaddemâ ihbâr olunmuş ve firâri-i mersûmun mâlı olmak üzere zikr olunan iki yüz yirmi iki yedek yağdan yüz üç yedek don ve çerviş yağı işbu târihe gelince mumcuyâna ve sâire bey‘ ettirilmiş olup lâkin zikr olunan yağdan bâkī el-yevm mevcûd olan yüz on dokuz yedek revgan-ı don ve çervişin altmış dört yedeği firâri-i mersûmun nişanıyla firâri-i mersûmun mâlı olup ve mâ‘adâsı olan elli beş yedeği sâhib-i arzuhâl Manol zimmînin müstakil kendi nişanıyla mesfûr Manol zimmînin mâlı olduğunu ve el-yevm kapan-ı mezkûrdan mevcûd ettiğini mesfûr Manol zimmî hâzır iken ihbâr ve tahkīkleri huzûr [-ı âlîlerine i‘lâm olundu.] Fî 8 S sene 1237