İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 167 Hüküm no: 139 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Mihal v. Dimitri’nin, çukacı dükkânı gediğini Fesci Ahmed Ağa’ya sattığı 6.000 guruşa çukacı mübâya‘ası Ma‘rûz[-ı dâ‘î-i devlet-i aliyyeleridir ki] Çukacı Mihal v. Dimitri nâm zimmî meclis-i şer‘-i münîrde bâ‘isü’l-i‘lâm Fesci Ahmed Ağa b. Salih b. Yunus nâm kimesne mahzarında takrîr-i kelâm edüp İstanbul’da Duâmeydanı’nda abacılar çarşısında fesciler sokağında vâki‘ Fesci Hacı Paşa ve Kapamacı Sakaoğlu dükkânları beynlerinde kâin hâzırcı tâ‘bir olunur bir kepenkli bir bâb çukacı dükkânı derûnunda mevcûde başmuhâsebede mukayyed beyne’l-hiref gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mezbûr Fesci Ahmed Ağa’ya altı bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âm ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup mezbûr Fesci Ahmed Ağa’nın mülk-i müşterâsı olmuşdur deyü ba‘de’l-ikrâr ve tasdîk mezbûr Fesci Ahmed Ağa âlât-ı mezkûrenin kaleminde mesfûr Çukacı Mihal zimmî üzerine olan kayd-ı atîki ref‘ ve terkīn-birle bu def‘a kendi ismine kayd ile yedine müceddeden sûret i‘tâsı niyâzında olmağın bu sûretde kalemde mukayyed zikr olunan gedik âlât-ı lâzımesinin bâyi‘-i mesfûr ismine olan kaydı ref‘ ve terkīn-birle müşteri-i mezbûr Fesci Ahmed Ağa ismine kayd ve yedine müceddeden sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 18 S sene 1237