İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 166 Hüküm no: 138 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardiros v. Markos’un, oda gediğini Abraham v. Avanes’e sattığı 2.000 guruşa bir bâb oda gediği mübâya‘ası Ma‘rûz[-ı dâ‘î-i devlet-i aliyyeleridir ki] Sarraf tâifesinden Mardiros v. Markos nâm zimmî meclis-i şer‘-i münîrde bâ‘isü’l-i‘lâm Na‘lbandoğlu Abraham v. Avanes nâm zimmî muvâcehesinde takrîr-i kelâm edüp İstanbul’da Mahmud Paşa Câmi‘-i şerîfi kurbünde müteveffâ Rüstempaşa Evkāfı müsakkafâtından Sultan Odaları demekle arîf bir bâb hanın fevkānîsinde sağ tarafında vâki‘ altıncı bir bâb oda derûnunda mevcûde başmuhâsebede mukayyed gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Abraham zimmîye iki bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i mezkûrede benim alâka ve medhalim kalmayup mesfûr Abraham zimmînin mülk-i müşterâsı olmuşdur deyü ba‘de’l-ikrâr ve’t-tasdîk mersûm Abraham zimmî âlât-ı mezkûrenin kaleminde mesfûr Sarraf Mardiros zimmî üzerine olan kayd-ı atîki ref‘ ve terkīn-birle bu def‘a kendi ismine kayd ile yedine müceddeden sûret i‘tâsı niyâzında olmağın bu makūle kalemde mukayyed oda gedik âlât-ı lâzımeleri bey‘ olundukta bâyi‘in ismine olan kaydı ref‘ ve terkīn-birle müşteri-i mersûm ismine kayd ve yedine müceddeden bir kıt‘a sûret i‘tâsı iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 16 S sene 1237