İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 168 Hüküm no: 141 Orijinal metin no: [28a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Döküncü, Yorgi ve Yuvan’ın, Hasan Mîrî Ahmed Efendi’ye olan borçlarını ödemeleri gerektiği 700 guruşa hüküm Ma‘rûz[-ı dâ‘î-i devlet-i aliyyeleridir ki] Müderrisîn-i kirâm-ı zevi’l-ihtirâmdan Hasan Mîrî Ahmed Efendi b. Ahmed Efendi İstanbul mahkemesinde meclis-i şer‘-i münîrde bakkāl esnâfından Döküncü v. Abraham ve Yorgi v. Tanaş ve Yuvan v. İstati nâm zimmîler muvâcehelerinde ben sene-i sâbıkā Cemâziyelâhiresi’nin üçüncü günü vilâyet-i Rumeli’nde Badracık kazâsında nâibü’ş-şer‘ iken kazâ-i mezbûrda mütemekkin Konomoğlu Yorgaki v. Atam zimmîye poliçe tarîkiyle mâlımdan ikrâz ve teslîm ol dahi iktirâz ve kabz ve istihlâk edüp ol vechile zimmetinde bana deyni olan bin üç yüz yetmiş guruş ile beni mahmiye-i İstanbul’da mütemekkin gāib ani’l-meclis Bakkāl Kibritoğlu Atanos v. Hristo zimmî üzerine poliçe tarîkiyle gıyâbında havâle ben dahi ba‘de’l-kabûl mahmiye-i mezbûreye gelüp yedime i‘tâ ettiği poliçe temessükünü zimmî-i mesfûra idâne ve havâle-i mezkûreyi i‘lâm eylediğimde ol dahi meblağ-ı mezbûra dâminim deyü havâle-i mezkûreyi kabûl edüp ba‘dehû huzûr-ı hâkimü’ş-şer‘de mesfûrdan da‘vâ eylediğimde ol vechile müdde‘âm olan meblağ-ı mezbûr bin üç yüz yetmiş guruşa bi’l-emr ve’l-kabûl mesfûrdan Döküncü ve Yorgi ve Yuvan zimmîler bi’l-ma‘iyye kefîl bi’l-mâl ve dâmin olmalarıyla meblağ-ı mezbûr bin üç yüz yetmiş guruş kefâlet-i mahkiyelerine binâen mesfûrûndan taleb ederim deyü tasaddî eylediğim da‘vâmdan bâ-vesâtet-i muslihîn yedi yüz guruş üzerine ba‘de akdi’l-musâlaha ve’l-kabûl bedel-i sulh-i merkūmdan mâ‘adâ bin üç yüz yetmiş guruşa varınca ziyâdesi olan [28b] altı yüz yetmiş guruşa müte‘allika âmme-i da‘vâdan asıl-ı gāib-i mesfûrun ve küfelâ-i mersûmdan Döküncü ve Yorgi ve Yuvan zimmîlerin zimmetlerini kabûllerini hâvî ibrâ ve iskāt etmemle ibrâdan müstesnâ bedel-i sulh-i mezkûr yedi yüz guruşu mesfûrûndan taleb ederim deyü da‘vâ ettikte onlar dahi cevâblarında kaziyye minvâl-i muharrer üzere olduğunu bi-tamâmihâ ikrâr u i‘tirâf etmeleriyle alâ-mûcebi ikrârihim bedel-i sulh-i mezkûr yedi yüz guruşu bi’t-taleb müdde‘î-i mûmâ-ileyhe edâ ve teslîmleriyle mesfûrûn Döküncü ve Yorgi ve Yuvan zimmîler ilzâm olundukları huzûr [-ı âlîlerine i‘lâm olundu.] Fî 14 S sene 1237