İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 169 Hüküm no: 142 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Memiş Ağa b. Abdullah’ın, firari olması sebebiyle evinin kapısı açılarak içerisindeki eşyaların sayıldığı Menzil küşâdı Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen savb-ı şer‘-i enverden mürsel baş [kâtib] İbrahim Ârif Efendi dâ‘îleri İstanbul’da Aksaray kurbünde Alem Bey Mahallesinde vâki‘ sâhibe-i arzuhâl Refia Hanım bt. Giridî İbrahim Efendi b. Ali’nin bâ-temessük-ı mütevellî bi’l-icâreteyn mutasarrıfe olduğu ma‘lûmü’l-hudûd bir bâb menzile ma‘an ümenâ-i şer‘den Çukadâr Süleyman Ağa b. Ahmed ve Muhzır Osman Çelebi b. Süleyman ile menzil-i mezkûra varup husûs-ı mezkûra mübâşir ta‘yîn olunan dîvân-ı âlî çavuşlarından el-Hâc Derviş Ömer Ağa b. Hasan ve mahalle-i mezbûre İmâmı İbrahim Efendi b. Osman ve ahâlîsinden Mehmed Emin Ağa b. Abdulkādir ve Kapıçukadâr[ı] Mustafa Ağa b. İbrahim ve Yakub Ağa b. el-Hâc Ahmed ve Tütüncübaşı Mustafa Ağa b. Ahmed ve Mehmed Alemdâr b. İbrahim ve diğer Mehmed Emin Ağa b. İsmail ve Ali Ağa b. İsmail ve Bekçi es-Seyyid İbrahim Beşe b. es-Seyyid Ali nâm kimesneler ile varup menzil-i mezkûrda müşâhereten müstecir iken müddet-i vâfireden berü mukaffelen terk ve ta‘til-birle diyâr-ı âhara firâr ve gaybet-i münkatı‘a ile gāib ve mefkūdlar olan Esirci Memiş Ağa b. Abdullah ile zevce Âişe nâm-ı diğer Zîbâ Kadın bt. Abdurrahman’ın müsteciren sâkinler oldukları menzil-i mezkûrun kuflunu feth ve küşâd ve derûnunda zuhûr eden mâllar tahrîr ve gāibân-ı zevcân-ı mezbûrânın halleri mütebeyyin oluncaya değin kıbel-i şer‘den kayyım nasb olunan mezbûre Refia Hanım’ın pederi merkūm Giridî İbrahim Efendi yedine bir kıt‘a mümzâ ve mahtûm defter mantûkunca li-ecli’l-hıfz îdâ‘ ve teslîm olunduğunu kayyım-ı mezbûr muvâcehesinde meclis-i şer‘a inhâ eylediklerinde ol dahi tasdîk eylediği tescîl ve İstanbul Mahkemesi’nden huzûr [-ı âlîlerine i‘lâm olundu.] Fî 15 S sene 1237