İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 171 Hüküm no: 144 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karahisâr-ı şarkî’deki Üryan Baba Zâviyesinin zâviyedârı Seyyid Hasan b. Şerefeddin’e berat verilmesi Berât istid‘âsı Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu arzuhâl derkenâra nazar olundukta Karahisâr-ı şarkī kazâsına muzâfe Göziyet nâhiyesine tâbi‘ Ahurcuk nâm karyede vâki‘ Üryân Baba Zâviyesi’nin hissedârlığına evlâdiyet ve meşrûtiyet üzere sâhib-i arzuhâl es-Seyyid Hasan b. Şerefeddin bâ-berât-ı şerîf-i âlîşân mutasarrıf olup lâkin yedimde olan berâtı zâyi‘ olmağla zâyi‘den yedine bir kıt‘a berât-ı şerîf-i âlîşân inâyet ve ihsân buyrulmak bâbında istid‘â-yı inâyet eylediği meâl-i arzuhâlden ve hissedârlık-ı mezkûr es-Seyyid Ali veledeş an-evlâd-ı vâkıf kasr-ı yedinden el-yevm mezbûr es-Seyyid Hasan b. Şerefeddin ammizâdeş an-evlâd-ı vâkıf üzerinde olduğu derkenârdan müstebân oldukdan sonra karye-i mezbûre ahâlîsinden es-Seyyid Hüseyin Ağa b. Ahmed ve es-Seyyid Hâfız Abdurrahim Ağa b. Abdullah ve es-Seyyid Mahmud Ağa b. Osman ve es-Seyyid Mustafa Ağa b. Yusuf nâm kimesnelerin meclis-i şer‘de el-yevm zâviyedârlık-ı mezkûr hissedârlığına merkūm es-Seyyid Hasan b. Şerefeddin bâ-berât mutasarrıf olduğu bi’l-muvâcehe alâ-tarîkı’ş-şehâde haber vermeleriyle mütehakkık olmağın bu sûretde sâhib-i arzuhâl merkūmun istid‘âsı üzere zâyi‘den yedine berât-ı şerîf-i âlîşân sadaka ve ihsân buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 21 S sene 1237