İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 170 Hüküm no: 143 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hâfız Mustafa Efendi’nin, Seyyid Mustafa Beşe’ye olan borcunu ödemesi gerektiği İki bin beş yüz elli altı guruşa hüküm Ma‘rûz[-ı dâ‘î-i devlet-i aliyyeleridir ki] Sâhib-i arzuhâl tüccârdan Mustafa Beşe b. es-Seyyid Mehmed nâm kimesne İstanbul mahkemesinde meclis-i şer‘-i şerîf-i enverde derûn-ı arzuhâl[de] isimleri mezkûr Mısırçarşısı attârlarından es-Seyyid el-Hâc Hâfız Mustafa Efendi b. es-Seyyid el-Hâc Mehmed muvâcehelerinde merkūmun şerîki el-Hâc Mustafa b. Osman hâzır oldukları hâlde benim hâlâ Anapa kazâsında sâkin es-Seyyid İsmail Ağa b. es-Seyyid Mustafa b. Abdullah zimmetinde yedimden ve mâlımdan iştirâ ve kabz eylediği ma‘lûmü’l-mikdâr kirbas semeninden iki bin beş yüz elli altı guruş alacak hakkım olmağla gāib-i mezbûr es-Seyyid İsmail Ağa beni işbu yedimde olan bin iki yüz otuz üç senesi Zilhicceti’ş-şerîfesinin yirmi birinci günü târihiyle müverrah bir kıt‘a temessük mantûkunca Âsitâne-i aliyyeye duhûlümden yüz seksen bir gün tamamında edâ olunmak üzere meblağ-ı merkūm iki bin beş yüz elli altı guruş ile beni poliçe tarîkiyle ancak mezbûr es-Seyyid el-Hâc Hâfız Mustafa Efendi üzerine gıyâbında havâle eylediğinde ben dahi Âsitâne-i aliyyeye gelüp havâle-i mezkûreyi merkūm es-Seyyid el-Hâc Hâfız Mustafa Efendi’ye ifâde ve temessük-ı mezkûrumu irâe eylediğimde ol dahi meblağ-ı mezbûra dâminim deyü havâle-i mezkûreyi kabûl ettikden sonra ecel-i merkūm hulûl edüp hâlâ bana edâ etmemekle meblağ-ı merkūm iki bin beş yüz elli altı guruşu hâlâ mezbûr es-Seyyid el-Hâc Mustafa Efendi’den taleb ederim deyü da‘vâ ettikte mezbûr es-Seyyid el-Hâc Mustafa Efendi cevâbında kaziyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi meblağ-ı merkūm iki bin beş yüz elli altı guruşun bi’t-taleb müdde‘î-i mezbûr es-Seyyid Mustafa Beşe’ye edâsıyla merkūm es-Seyyid el-Hâc Hâfız Mustafa Efendi ilzâm olunduğu huzûr [-ı âlîlerine i‘lâm olundu.] Fî 8 S sene 1237