İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 172 Hüküm no: 146 Orijinal metin no: [28b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan Ağa b. Ali’nin kiracısı olduğu odayı tahliye ederek Kasım Ağa b. Said’e teslim edeceği Bir bâb oda teslîmi ta‘ahhüd Ma‘rûz[-ı dâ‘î-i devlet-i aliyyeleridir ki] İstanbul’da Uzunçarşı nezdinde vâki‘ Çiçekçibaşı Hanı demekle arîf Ayasofya-i kebîr Vakfı müsakkafâtından ma‘lûmü’l-hudûd bir bâb kârgîr hanın bi’l-icâreteyn mutasarrıfı fesciler kethüdâsı Kasım Ağa b. el-Hâc Said meclis-i şer‘-i münîrde han-ı mezkûrun fevkānîsinde cânib-i yesârda vâki‘ dördüncü bir bâb odada şehriye dörder guruş kirâ ile müsteciri olan Kebeci el-Hâc Hasan Ağa b. el-Hâc Ali muvâcehesinde mezbûr el-Hâc Hasan Ağa zikr olunan bir bâb odanın aded-i şuhûr beyân olunmaksızın beher şehr dörder guruş kirâ ile müsteciri olup lâkin oda-i mezkûrenin bana lüzûmu olmağla işbu târih-i i‘lâm şehri gāyetine izâfetle fesh-i îcâr-birle oda-i mezkûreyi tahliye ve bana teslîme mezbûr el-Hâc Hasan Ağa’ya tenbîh olunmak matlûbumdur deyü da‘vâ ettikte mezbûr el-Hâc Hasan Ağa dahi cevâbında kaziyye minvâl-i muharrer üzere olduğunu bi-tamâmihâ ikrâr u i‘tirâf ve oda-i mezkûreyi gāyet-i şehr-i mezkûrda ber-vech-i muharrer tahliye ve mutasarrıfı müdde‘î-i mezbûr Kasım Ağa’ya teslîme ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 16 S sene 1237 [Beyâz]