İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 172 Hüküm no: 147 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Ahmed b. İsmail’in, kethüda Mustafa Ağa aleyhine açtığı alacak davasının zaman aşımı sebebiyle reddedildiği Berberân esnâfının kethüdâlığının maslahatından 2.000 guruşa hüküm Ma‘rûz[-ı dâ‘î-i devlet-i aliyyeleridir ki] Mübârek kamer-tâb-ı hüsrevâneye arzuhâl takdîm eden Berber el-Hâc Ahmed b. İsmail nâm kimesne Çarşamba günü arz odasında huzûr-ı lâmi‘u’n-nûr-ı hazret-i Sadr-ı a‘zamîde ma‘kūd meclis-i şer‘-i münîrde mahrûse-i Galata ve tevâbi‘inde vâki‘ berberân esnâfının bâ-berât-ı âlîşân kethüdâları arzuhâlde mastûrü’l-ism es-Seyyid el-Hâc Mustafa Ağa b. es-Seyyid Ahmed mahzarında işbu arzuhâl hâmişinde mastûr başmuhâsebe kalemi derkenârı mûcebince Tophâne-i âmirede toparabacılar kışlası inşâ olunan mahalde kalafat yerinde vâki‘ başmuhâsebe kaleminde müteveffâ Berber Ahmed ismine mukayyed bir bâb berber dükkânı derûnunda mevcûde gedik âlât-ı lâzımesi müteveffâ-i mezbûr Berber Ahmed’in yedinde mâlı olup ve dükkân-ı mezkûr ile âhar on bir bâb dükkân bin iki yüz sekiz senesi hılâlinde toparabacılar kışlasına ilâve olunup zikr olunan dükkânların gedikleri Tophâne meydanına ihdâs olunan dükkânlara nakle ruhsat verildikden sonra ben merkūm Berber Ahmed bilâ-vâris vefât etmek zannıyla bin iki yüz on sekiz senesi hılâlinde zikr olunan Tophâne’de eski kârhâne kapısı kurbünde olan bir bâb attâr dükkânını mutasarrıfından istihyâ ve ta‘mîr ve derûnuna berber takımımı vaz‘-birle müteveffâ-i mezbûrun ismi ismime mutâbık olmak takrîbiyle yedimde olan i‘lâm mantûkunca müteveffâ-i merkūmun mâlik olduğu gedik âlâtına ben mâlik olduğumu kethüdâ-yı merkūm ba‘zı esnâfıyla târih-i mezkûrda Galata mahkemesine varup ihbâr etmeleriyle âlât-ı gedik-i mezkûrun benim müstecir olduğum attâr dükkânına nakle ruhsat niyâzıyla i‘lâm olundukta kethüdâ-yı merkūm sâlifü’l-beyân bin iki yüz on sekiz senesi hılâlinde kethüdâlık nâmıyla mâlımdan ve yedimden rüşvet olarak iki bin guruşumu ahz ve istihlâk ettikden sonra ben ol esnâda âlât-ı gedik-i mezkûrun nısfını dokuz yüz guruşa âhara bey‘ ve nısf-ı âharını yedimde ibkā edüp bin iki yüz otuz üç senesine gelince müşterikimle isti‘mâl etmek üzere iken sene-i mezkûrede müteveffâ-i merkūm Berber Ahmed’in kızı Âişe Hatun zuhûr ve zikr olunan gedik âlâtı babası müteveffâ-i merkūmun olup ba‘dehû kendüye mevrûs olduğunu iddi‘â ve kethüdâ-yı merkūm dahi âlât-ı gedik-i mezbûr müteveffâ-i merkūm Berber Ahmed’in olup ba‘dehû kızı mezbûreye mevrûs olduğunu esnâfıyla haber vermeleriyle âlât-ı gedik-i mezkûru merkūme Âişe Hatun zabt etmişidi el-hâletü hâzihî kethüdâ-yı merkūmun zikr olunan bin on sekiz senesi hılâlinde rüşvet olarak kethüdâlık nâmıyla benden aldığı meblağ-ı müstehlek-i mezkûr iki bin guruşu zikr olunan bin iki yüz otuz üç senesine değin ben kethüdâ-yı merkūm Der-aliyye’de mevcûd iken on beş sene müddet da‘vâ etmeyüp bilâ-özr-i şer‘î sükūt eylediğim gedik-i mezkûrun bir nizâ‘ı zuhûr etmediğinden nâşî olduğundan gadr olmuş olmağla meblağ-ı mezkûr iki bin guruşu kethüdâ-yı merkūmdan hâlâ istirdâd ederim deyü kethüdâ-yı merkūmun külliyen inkârına mukārin tasaddî eylediği iki bin guruş da‘vâsının bilâ-emr-i âlî istimâ‘ı memnû‘ idüğü müdde‘î-i merkūm Berber el-Hâc Ahmed Ağa’ya tefhîm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 21 L sene 1236