İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 177 Hüküm no: 150 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostan v. Kostan’ın, Kosta v. Hristo aleyhine açtığı alacak davasında iddiasını ispat edemediği Mu‘ârazadan men‘ Ma‘rûz[-ı dâ‘î-i devlet-i aliyyeleridir ki] Fransa tüccârından Kostan v. Kostan nâm müste’men tarafından husûs-ı âtîde vekîl olduğu Yasakçı Ali Bayrakdâr b. Ali ve Yasakçı Mahmud b. Abdullah nâm kimesneler şehâdetleriyle ber-nehc-i şer‘î sâbit olan Simsar Yasef v. Matatya nâm Yahûdi müste’men-i mersûmun tercümânı kapıoğlanı hâzır olduğu hâlde İstanbul mahkemesinde meclis-i şer‘-i enverde İplikçi Kosta v. Hristo nâm zimmî muvâcehesinde müvekkil-i mersûm Kostan nâm müste’men hâzır bi’l-meclis İplikçi Tavid v. Manok zimmî zimmetinde semen-i mebî‘-i makbûzdan bin sekiz yüz seksen iki guruş alacak hakkı olup mesfûr Tavid zimmînin dahi mesfûr Kosti zimmîye bâ-re’y-i mütevellî ferağ ve tefvîz eylediği İstanbul’da Kumkapı kurbünde Muhsine Hatun Mahallesinde vâki‘ ashâb-ı hayrâtdan Kethüdâ Mehmed Ağa Vakfı müsakkafâtından bir bâb menzil bedelinden mesfûr Kosti zimmîlere bin dokuz yüz guruş alacağı olmağla mesfûr Tavid zimmî müvekkilim müste’men-i mersûmu meblağ-ı merkūm bin sekiz yüz seksen iki guruş ile bedel-i ferağ-ı merkūmdan edâ etmek üzere mersûm Kosti zimmî üzerine bi’l-muvâcehe havâle-i mukayyede ile havâle ve her biri havâle-i merkūmeyi kabûl edüp mesfûr Kosti zimmî meblağ-ı muhtâllün-bih-i mezkûru hâlâ edâ etmemekle meblağ-ı merkūm bin sekiz yüz seksen iki guruşu havâle-i merkūmeye binâen mersûm Kosta zimmîden bi’l-vekâle taleb ederim deyü takrîr-i meşrûhu üzere bedel-i ferağdan havâle-i fâside ile eylediği havâle da‘vâsı şer‘an bâtıla olmağla mu‘tebere ve mesmû‘a olmayup meblağ-ı merkūm-ı muhayyel hâzır-ı mersûmdan mutâlebe iktizâ eylediği müdde‘î-i vekîl-i mersûm Yasef Yahûdi’ye tefhîm ve da‘vâ-yı mezkûresiyle mesfûr Kosta zimmîye bî-vech mu‘ârazadan men‘ olunduğu mahkeme-i merkūmeden huzûr [-ı âlîlerine i‘lâm olundu.] Fî 5 S sene 1237