İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 175 Hüküm no: 149 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İplikçi Tavid v. Manok’un, iplikçi esnafına olan borcunu ödemesi gerektiği İkrâr mûcebiyle hüküm 7.416 guruş Ma‘rûz[-ı dâ‘î-i devlet-i aliyyeleridir ki] Şam-ı şerîf tüccârından es-Seyyid Abdürrezzak Ağa b. Kabâkibîzâde es-Seyyid Mehmed Emin Ağa nâm kimesne İstanbul mahkemesinde meclis-i şer‘-i enverde Yahya Ağa b. Halil nâm kimesne asâleten ve Manol v. Yani nâm zimmî tarafından vekîl-i sâbitü’l-vekâlesi Yani v. Vasil zimmî vekâleten Kirkor v. Agob ve Artin v. Bedros ve Kigork v. Mardros ve Metro v. Todori ve İstefan v. Bedros ve Haçador v. Malak ve Şehrioğlu Agob v. Serab nâm zimmîler kezâlik asâleten hâzır oldukları hâlde İplikçi Tavid v. Manok nâm zimmî muvâcehesinde benim gāib ani’l-meclis Şalcı Mahmud Ağa b. Abdullah zimmetinde mâlımdan ve yedimden iştirâ ve kabz eylediği şal semeninden iki bin iki yüz doksan üç [guruş] alacak hakkım olup mezbûr Mahmud Ağa’nın dahi kezâlik mâlından bey‘ ve teslîm eylediği Felemenk ipliği semeninden mersûm Tavid zimmî zimmetinde ol mikdâr guruş alacak hakkı olmağla mezbûr Mahmud Ağa deyn-i mezkûru ile beni medyûn-ı mersûm Tavid zimmî üzerine meblağ-ı merkūmu bana edâ etmek üzere havâle-i mukayyede ile bi’l-muvâcehe havâle ve her birimiz havâle-i mezkûreyi kabûl edüp ol vechile cihet-i havâle-i merkūmeden mersûm Tavid zimmî zimmetinde alacak hakkım olan meblağ-ı merkūm iki bin iki yüz doksan üç guruşu ve hâzır-ı merkūm Yahya Ağa’nın kezâlik mersûm Tavid zimmî zimmetinde mâlından bey‘ ve teslîm eylediği Felemenk ipliği semeninden sekiz [yüz] yirmi altı guruş ve müvekkil-i mersûm Manol zimmînin kezâlik mersûm Tavid zimmî zimmetinde mâlından bey‘ ve teslîm eylediği iplik semeninden dokuz yüz altmış dört guruş ve hâzır-ı mersûm Kirkor zimmînin kezâlik mersûm Tavid zimmî zimmetinde mâlından bey‘ ve teslîm eylediği iplik semeninden dört yüz seksen dokuz guruş ve hâzır-ı mersûm Artin zimmînin kezâlik mersûm Tavid zimmî zimmetinde mâlından bey‘ ve teslîm eylediği iplik semeninden altı yüz otuz altı guruş ve hâzır-ı mesfûr Kigork zimmînin kezâlik mesfûr Tavid zimmî zimmetinde mâlından bey‘ ve teslîm eylediği iplik semeninden üç yüz yirmi sekiz guruş ve hâzır-ı mersûm Dimitri zimmînin kezâlik mesfûr Tavid zimmî zimmetinde mâlından bey‘ ve teslîm eylediği iplik semeninden yüz on dört guruş ve hâzır-ı mesfûr İstefan zimmînin kezâlik mesfûr Tavid zimmî zimmetinde mâlından bey‘ ve teslîm eylediği iplik semeninden iki yüz on beş guruş ve hâzır-ı mersûm Haçador zimmînin kezâlik mesfûr Tavid zimmî zimmetinde mâlından bey‘ ve teslîm eylediği iplik semeninden sekiz yüz kırk guruş ve hazır-ı mesfûr şehrioğlu Agob zimmînin kezâlik mesfûr Tavid zimmî zimmetinde mâlından bey ve teslim eylediğin iplik semeninden yedi yüz on bir guruş ki min-haysü’l-mecmû‘ yedi bin dört yüz on altı guruş alacak hakkımız olmağla mebâliğ-i mezkûreyi ben hâzirûn-ı merkūmûndan her birimiz asâleten ve vekâleten mersûm Tavid zimmîden taleb ederiz deyü hâzirûn-ı merkūmûnun tasdîkleriyle bi’l-ma‘iyye eyledikleri da‘vâlarını mesfûr Tavid zimmî bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi meblağ-ı mezkûrenin müdde‘ûn-ı merkūmûndan her birine bi’t-taleb edâsıyla mesfûr Tavid zimmî ilzâm olunduğu mahkeme-i merkūmeden huzûr [-ı âlîlerine i‘lâm olundu.] Fî 9 M sene 1237