İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 178 Hüküm no: 152 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vezîriazâm Mehmed Paşa vakfının mütevellîsi Mehmed Hâşim Efendi’nin vefâtıyla, vakıf tevliyetinin kızları Şerîfe, Safiye, Mahdûme ile Ayşe Hanım’a tevcih edildiği Münâsafaten evlâdlara tevliyet istid‘âsı Mukābele şüd Ma‘rûz[-ı dâ‘î-i devlet-i aliyyeleridir ki] Nezâret-i hazret-i Şeyhülislâm -sellemehü’s-selâmî-de âsûde evkāfdan İstanbul’da Yenikapı nezdinde vâki‘ merhûm Vezîriazâm-ı esbak Hacı Hoca Mehmed Paşa Câmi‘-i şerîf ve mekteb-i münîfi vakfının yevmî yirmi akçe vazîfe ile ber-vech-i meşrûta bâ-berât-ı âlîşân mütevellîsi olan vâkıfdan ve müderrisîn-i kirâmdan Bâkîzâde hafîdi es-Seyyid Mehmed Hâşim Efendi b. es-Seyyid Ali Efendi fevt olup tevliyet-i mezkûre mahlûle oldukdan sonra derûn-ı arzuhâlde ismi mezkûre Âişe Hanım bt. Mehmed Emin Efendi’nin zevci ve tarafından husûs-ı âtîde vekîl-i müseccel-i şer‘îsi es-Seyyid Mehmed Tahir Efendi b. el-Hâc Mehmed Sa‘îd bi’l-ma‘iyye rü’yete memûr nezâret-i hazret-i müşârun-ileyhde âsûde evkāf müfettişi Kütahyevîzâde müderrisîn-i kirâm-ı zevi’l-ihtirâmdan fazîletlü es-Seyyid Mehmed Ârif Efendi dâ‘îleriyle du‘âhânemizde ma‘kūd meclis-i şer‘-i münîrde vakf-ı mezbûra li-ecli’l-maslaha kāimmakām-ı mütevellî nasb ve ta‘yîn olunan es-Seyyid Mehmed Said Ağa b. Ali muvâcehesinde vâkıf-ı merhûm-ı müşârun-ileyhin sulbiye kızı Emine Hanım’ın oğlu Mehmed Hâşim Efendi’nin oğlu es-Seyyid Ali Efendi’nin oğlu mütevellî-i müteveffâ-i mûmâ-ileyh Bâkīzâde hafîdi es-Seyyid Mehmed Hâşim [30a] Efendi’nin sulbiye kebîre kızı sâhibe-i arzuhâl Şerîfe Safiye Mahdûme Hanım tarafından husûs-ı âtîde vekîl olduğu zâtını ârifân Ali Ağa b. İbrahim ve el-Hâc İbrahim Ağa b. Ahmed nâm kimesne şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan es-Seyyid Mehmed Esad Efendi b. es-Seyyid Mehmed Mazhar Efendi hâzır olduğu hâlde vâkıf-ı merhûm-ı müşârun-ileyh Hacı Koca Mehmed Paşa bin altmış senesi Rebî‘ülevvelinin on ikinci günü târihiyle müverraha derdest olan bir kıt‘a vakfiye-i ma‘mûlün bihâsında tasrîh ve beyân olunduğu üzere vakf-ı merkūmun yevmî yirmi akçe vazîfe ile tevliyetini hayâtında oldukça el-Hâc Mehmed Ağa nâm kimesneye ve ba‘de vefâtihi vâkıf-ı merhûm-ı müşârun-ileyh kendinin aslah evlâdından ve evlâd-ı evlâdından birisi izn-i şer‘ ve ma‘rifet-i nâzır ile mütevellî olup galle-i vakıfdan mesârif ve vezâif-i vakf-ı müşârun-ileyhe ba‘de’l-edâ fazla kalan galle dahi vâkıf-ı müşârun-ileyhin evlâdına ve evlâd-ı evlâdına meşrûta olup ile’l-inkırâz ale’s-seviyye mutasarrıf olalar deyü şart ve ta‘yîn edüp ol vechile şart-ı vâkıf-ı müşârun-ileyh üzere tevliyet-i mezkûreye bâ-berât-ı âlîşân mutasarrıf olan mûmâ-ileyh es-Seyyid Mehmed Haşim Efendi bu esnâda fevt olup tevliyet-i mezkûre mahlûle oldukda zevcem müvekkile-i mûmâ-ileyhâ Âişe Hanım dahi vâkıf-ı merhûm-ı müşârun-ileyh Hacı Koca Mehmed Paşa’nın sulbî oğlu es-Seyyid Bey’in kızı Ümmühani Hanım’ın kızı Fâtıma’nın kızı Hadice Hanım bt. Ahmed Efendi’nin sadriye kızı ve mütevellî-i müteveffâ-i mûmâ-ileyhin kızı müvekkile-i mûmâ-ileyhâ Şerîfe Safiye Mahdûme Hanım ile derecede müsâviye ve sinnen müvekkile-i merkūmeden ekber ve mezbûreden aslah ve nevbet-i tasarruf kendinin olmağla tevliyet-i mezkûre şart-ı vâkıf üzere kendüye tevcîh olunmak müvekkilem zevcem mûmâ-ileyhâ Âişe Hanım’ın matlûbudur deyü da‘vâ ettikte kāimmakām-ı merkūm cevâbında hâzır-ı vekîl-i merkūm es-Seyyid Mehmed Esad Efendi’nin bi’l-vekâle tasdîkiyle evvelâ müdde‘î-i vekîl-i merkūmun müvekkile-i mûmâ-ileyhâ Âişe Hanım vâkıf-ı merhûm-ı müşârun-ileyh evlâdından olduğunu ba‘de’l-inkâr vekîl-i müdde‘î-i merkūm es-Seyyid Mehmed Tahir Efendi evvelâ zevcesi müvekkile-i mûmâ-ileyhâ Âişe Hanım ber-vech-i muharrer evlâd-ı vâkıf-ı müşârun-ileyhden ve derecede müvekkile-i mûmâ-ileyhâ Şerîfe Safiye Mahdûme Hanım ile müsâviye olduğunu lede’t-tezkiye makbûlü’ş-şehâde idükleri ihbâr olunan el-Hâc İshak Efendi b. Abdurrahim ve es-Seyyid Mehmed Efendi b. es-Seyyid Yakub nâm kimesneler şehâdetleriyle bi’l-muvâcehe ba‘de’l-isbât vakfiye-i merkūmede muharrer ve tevliyet-i mezkûre şartında ekber kaydı olmayup aslah evlâddan birine meşrûta olmağın tarafeynden her biri dahi aslah ve umûr-ı vakfı a‘lem olduğunu bi’l-cümle mürtezika-i vakf mazbûtü’l-esâmî Müslimîn bi’l-muvâcehe ihbâr ve müvekkiletân-ı mûmâ-ileyhimâdan her biri aslahiyetde âhar ile müsâviye idüğünü tasdîk eylediğini vekîlân-ı merkūmân meclis-i şer‘de ikrâr edüp ol vechile müvekkiletân-ı mûmâ-ileyhimâdan birine sıfaten tercîh bulunmadığından kat‘an li’n-nizâ‘ muslihûn tavassutuyla tevliyet-i mezkûreyi nısfiyet üzere iştirâken tasarrufa müvekkiletân-ı mûmâ-ileyhimâdan her biri râzıye oldu deyü vekîl-i merkūm es-Seyyid Tahir Efendi’nin müvekkilesi mûmâ-ileyhâ Âişe hanıma izâfetle bi’l-vekâle eylediği takrîrini vekîl-i hâzır-ı mezbûr es-Seyyid Mehmed Esad Efendi kezâlik müvekkilesi mûmâ-ileyhâ Şerîfe Safiye Mahdûme Hanım’a izâfetle bi’l-vekâle tasdîk ve kabûl etmeğin vakf-ı müşârun-ileyhin gālib-i müstagallatı kurâ ve mezârî olduğundan tevliyet-i mezkûreyi ber-vech-i muharrer iştirâken tasarruflarında tevcîh-i pâdişâhî dahi şer‘an mu‘teber olmağın bu sûretde tevliyet-i mezkûre vazîfe-i mersûmesiyle mütevellî-i müteveffâ-i mezbûrun mahlûlünden nısfiyet üzere iştirâken aslah evlâd-ı evlâd-ı vâkıfdan ve aslahiyet-i müsâviye idükleri bi’t-tasâdduk mütehakkık olan müvekkile-i mûmâ-ileyhâ Âişe Hanım ile mütevellî-i müteveffâ-i mûmâ-ileyhin kızı müvekkile-i mûmâ-ileyhâ Şerîfe Safiye Mahdûme Hanım’a nısfiyet üzere iştirâken tevcîh ve yedlerine başka başka berât-ı şerîf-i âlîşân sadaka ve ihsân buyrulmak bâbında fermân-ı âlîleri sudûru iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 5 S sene 1237