İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 188 Hüküm no: 162 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abbas Ağa b. Mehmed’in, Süleyman Ağa b. Seyyid Ahmed’e olan borcunu ödemesi gerektiği Dört bin üç yüz on üç guruş hüküm Ma‘rûz[-ı dâ‘î-i devlet-i aliyyeleridir ki] Sâhib-i arzuhâl es-Seyyid Süleyman Ağa b. es-Seyyid Ahmed nâm kimesne meclis-i şer‘-i münîrde mukaddemâ şerîki derûn-ı arzuhâlde mezkûrü’l-ism es-Seyyid Abbas Ağa b. Mehmed nâm kimesne muvâcehesinde mezbûr es-Seyyid Abbas Ağa ile İstanbul hısnı ebvâbından Odunkapısı hâricinde kâin bir bâb yumurtacı dükkânında fâide-i hâsıla beynimizde berâber iktisâm olunmak üzere bilâ-sermâye pirinç ve dakīk ve peynir bey‘ u şirâsında mezbûr es-Seyyid Abbas Ağa ile şirket-i vücûh tarîk ile sene-i sâbıkā şehr-i Ramazani’l-mübârekinin on yedinci günü akd-i şirket edüp ve ben Tekfurdağı’nda ma‘lûmü’l-esâmî kimesneler yedlerinden nesne iştirâ eylediğim on beş bin beş yüz seksen beş guruşluk pirinç ve dakīk ve peyniri kayıklara vaz‘ ve Âsitâne-i aliyyede şerîkim mezbûra irsâl ol dahi ba‘de’l-ahz eşyâ-i muharrere-i mezkûreyi âhara bey‘le istihlâk edüp işbu sene-i mübâreke Muharremi gāyetine gelince dört ay on üç gün şerîkler olup ba‘dehû fesh-i akd-i şirket-birle hesâbımızı esnâf-ı merkūme kethüdâsı Ömer Ağa ve Ellialtı Hasan Ağa ve Çamurcu Mehmed ve Resul Yazıcı ve sâir cerîdede mazbûtü’l-esâmî kimesneler huzûrlarında sehv ve galatdan ârî yegān yegān hesâb-ı sahîh ile rü’yet eylediğimizde bin iki yüz guruş fâide-i hâsıla zuhûr edüp ve meblağ-ı mezkûr on beş bin beş yüz seksen beş guruşun on bin yüz yetmiş yedi guruşunu gerek nakden ve gerek havâleten mukaddemâ ceste ceste bana edâ ve teslîm ben dahi yedinden ahz ü kabz edüp bâkīsi olan üç bin yedi yüz altmış buçuk guruş ile fâide-i hâsıladan benim hisseme isâbet eden beş yüz elli iki buçuk guruş ki cem‘an dört bin üç yüz on üç guruşu mezbûr es-Seyyid Abbas Ağa kendi umûruna sarfla istihlâk-birle zimmetine ta‘alluk edüp hatta ikrâr dahi etmekle meblağ-ı mecmû‘-ı mezkûru ber-vech-i muharrer lede’l-muhâsebe merkūmdan taleb eylediğimde ol dahi cevâbında kaziyye minvâl-i meşrûh üzere olduğunu bi-tamâmihâ tâyi‘an ba‘de’l-ikrâr hesâb-ı mezkûrda galat vâki‘ olmağla tekrar hesâbımız rü’yet olunmak matlûbumdur dedikde bi’t-terâzî ma‘rifet-i şer‘le dahi hesâblarımız rü’yet olundukta hesâb-ı mezkûr sahîh olduğu bi’l-muvâcehe zâhir olup meblağ-ı mezbûr ber-vech-i muharrer zimmetinde ta‘alluk eylediğini kemâ-fi’s-sâbık ikrâr etmekle meblağ-ı merkūm dört bin üç yüz on üç guruşu hâlâ taleb ederim deyü da‘vâ ettikte ol dahi cevâbında kemâ-fi’s-sâbık kat‘iyyen ikrâr u i‘tirâf edüp lâkin işbu târihden iki ay mukaddem dâyinim olan bir kimesne gelüp beni zâbıtâna verüp ben dahi havfımdan nâşî dükkân-ı mezkûru açık bırakıp gitmemle ol vechile dükkân-ı mezkûrda peştahta ve derûnunda kîse içinde mevzû‘ mâl-i şirketimizden olarak dört bin beş yüz guruşumuz hufyeten ahz olunmuş olup meblağ-ı merkūm ile benim gāibûn ani’l-beled Ali Paşa hanında Küfeci Cezizme zimmî zimmetinde kaşar peyniri semeninden doksan beş guruş yirmi sekiz para ve Kanbur hanında Kozma zimmî zimmetinde kezâlik kaşar peyniri semeninden seksen bir guruş otuz iki para ve Üsküdar’da Toptaşında Çörekçi Tanaş zimmî zimmetinde dakīk semeninden altmış iki buçuk guruş ve Kanbur hanında Kosti zimmî zimmetinde kaşar peyniri semeninden seksen dokuz guruş otuz iki para ve Tophâne’de Hacı Mustafa zimmetinde dakīk semeninden yetmiş üç guruş ve Edirnekapısı’nda Topçu Ali zimmetinde dakīk semeninden elli dokuz buçuk guruş ve Köroğlan zimmî zimmetinde dakīk semeninden on sekiz guruş yirmi iki para ve Odunkapısı’nda Yağcı Dimitri zimmî zimmetinde dakīk semeninden seksen beş guruş on dört para ve Ayvansaray kapısı hâricinde Boğçacı Mahmud zimmetinde dakīk semeninden yetmiş yedi guruş yirmi beş para ve Üsküdar’da Yenimahalle’de Karabet zimmî zimmetinde pirinç semeninden otuz guruş ve Kumkapı’da İbrahim Ağa dükkânında ismi ma‘lûmum olmayan bir bakkāl zimmî zimmetinde pirinç semeninden iki yüz on dört guruş on yedi para ve Vezirhanı’nda bakkāl olup ismi ma‘lûmum olmayan bir zimmî zimmetinde pirinç semeninden yüz elli iki guruş ve Kanburhanı’nda Küfeci Çolakoğlan zimmî zimmetinde pirinç semeninden iki yüz yirmi guruş yirmi üç para ve Balipaşa’da Pazarcı Karaoğlan zimmî zimmetinde pirinç semeninden altmış yedi buçuk guruş ve Pazarcı Çolak Halil zimmetinde pirinç semeninden iki yüz elli dokuz guruş on dört para ki cem‘an bin beş yüz seksen dokuz guruş yirmi yedi para alacak hakkımız olup ve tahsîl olunmak ihtimâli olmadığından meblağ-ı merkūm ile hufyeten ahz olunan dört bin beş yüz guruş ki min-haysü’l-mecmû‘ altı bin seksen dokuz buçuk guruş hesâbımız olmağla hissesine isâbet eden üç bin kırk dört guruş otuz parayı deynim olan dört bin üç yüz on üç guruşun ol mikdârına takās murâdımdır deyü takrîr-i meşrûhu üzere evvelâ dört bin beş yüz guruş husûsunda mekânı muharrer olmayup te‘addî ve taksîrini ve sâniyen muhâsebe-i mezkûrede zarâr terettüb etmeyüp fâide-i hâsıla olduğunu mukır ve mu‘terif iken ber vech-i muharrer sirka olundu ve zimem-i nâsda kaldı deyü eylediği da‘vâsı mesmû‘a olmadığını kendüye tefhîm ve da‘vâ-yı mezkûresiyle mezbûr es-Seyyid Süleyman Ağa’ya bî-vech mu‘ârazadan ba‘de’l-men‘ sâlifü’l-beyân ikrâr u i‘tirâfıyla lâzım gelen meblağ-ı bâkī-i merkūm dört bin üç yüz on üç guruşun müdde‘î-i mezbûr es-Seyyid Süleyman Ağa’ya edâ ve teslîmiyle merkūm es-Seyyid Abbas Ağa ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 29 S sene 1237