İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 187 Hüküm no: 161 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta ve Vasil’in, Yedikule’deki kasap dükkânı gediğini Hasan Ağa’ya devrettiği Kasablara taraf-ı vakıfdan izin istid‘âsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân hazretlerinin evkāf-ı hümâyûnlarından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden yedinci selhhâneye merbût kasab dükkânlarından İstanbul’da Aksaray kurbünde sebîl karşısında kâin bir bâb kasab dükkânı derûnunda mevcûde beyne’l-esnâf gedik tâ‘bir olunan âlât-ı lâzıme-i ma‘lûmenin nısfı bir kıt‘a arzuhâl hâmişinde mastûr defter-i vakıfdan derkenâr olduğu üzere Yani v. Dimitri nâm zimmînin bâ-temessük-ı mütevellî taht-ı tasarrufunda olup hâlik oldukda sulbî kebîr oğulları Kosta ve Vasil zimmîde âdiyen ba‘de’l-intikāl mersûmân Kosta ve Vasil zimmîler meclis-i şer‘-i münîrde hâlâ hâssa kasabbaşısı hâcegân-ı dîvân-ı hümâyûndan es-Seyyid Ali Efendi tarafından mürsel kasablar kethüdâsı el-Hâc Hasan Ağa b. el-Hâc Osman ve sâir kasab ustaları hâzır oldukları hâlde kasab ustalarından bâ‘isü’l-i‘lâm diğer el-Hâc Hasan Ağa b. el-Hâc Halil nâm kimesne muvâcehesinde her biri asâleten takrîr-i kelâm edüp zikr olunan kasab dükkânı derûnunda mevcûde âlât-ı lâzıme-i mezkûreden ber-vech-i muharrer bize intikāl eden nısf hisseyi bedel-i ma‘lûm ve makbûz mukābelesinde ferağ-ı kat‘î-i mu‘teber ile bâ-re’y-i mütevellî mezbûr diğer el-Hâc Hasan Ağa’ya bi’l-asâle ferağ ve tefvîz eylediğimizde ol dahi ber-vech-i muharrer tefevvüz ve kabûl ve hisse-i tevzî‘ini ustalar ma‘rifetleriyle tamamen ahz etmek üzere ta‘ahhüd edüp [32a] ve fîmâ ba‘d kasab gediği tâ‘bir olunan âlât-ı lâzıme-i mezkûrenin nısfında bizim kat‘an alâka ve medhalimiz kalmamağla mezbûr diğer el-Hâc Hasan Ağa’nın hakk-ı müfavvazı olmuşdur dediklerini mezbûr diğer el-Hâc Hasan Ağa tasdîk edüp lâkin mersûmânın babaları hâlik-i mesfûrun tasarrufunu mübeyyen yedlerinde olan atîk temessük zâyi‘ olmağın nısf-ı âlât-ı mezkûre hâlik-i mesfûrun tasarrufunda olup oğulları mesfûrâna intikāl eylediğini esnâf-ı merkūme kethüdâsı mezbûr el-Hâc Hasan Ağa ile kasab ustalarından Üsküdarî Yani v. Sava ve Tophâneli Nikola v. Kosta ve Hasköylü Nikola v. Panayot zimmîler ihbâr etmeleriyle nısf-ı hisse-i mezkûre babaları hâlik-i mesfûrdan oğulları mersûmâna intikāl eylediğini müş‘ir zâyi‘den bir kıt‘a temessük i‘tâ ve ba‘dehû mersûmânın ferağlarından merkūm diğer el-Hâc Hasan Ağa üzerine tahrîr ve defter-i vakfa ve tasarrufuna taraf-ı vakıfdan izin verilmek bâbında istid‘â-yı inâyet eylediği İstanbul Mahkemesi’nden huzûr [-ı âlîlerine i‘lâm olundu.] Fî 23 Safer sene 1237