İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 191 Hüküm no: 164 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa Vakfı’ndan icareli menzile mutasarrıf olan Molla Mehmed b. Ahmed’in, evine sonradan açtığı yedi adet pencereyi kapatacağını taahhüt ettiği Keşf Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri câ‘î husûsun mahallinde lede’l-mu‘âyene keşf ve fasl ü hasmı içün savb-ı şer‘-i enverden irsâl olunan kâtib Mehmed Hidâyetullah Efendi dâ‘îleri ve bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan Hatîbzâde fazîletlü es-Seyyid Mehmed Derviş Efendi tarafından mansûb Kâtib es-Seyyid Hâfız Mehmed Efendi ve nezâret-i hazret-i Sadr-ı a‘zamîde ve âsûde evkāf müfettişi müderrisîn-i kirâm-ı zevi’l-ihtirâmdan fazîletlü Mehmed Said Efendi tarafından mürsel Kâtib Hasan Hüsnü Efendi Hâssa mimarı hulefâsından Mehmed Emin ve Safi Mustafa Halîfeler ile İstanbul’da Sandıkçılarbaşında Ali Paşa-yı atîk Câmi‘-i şerîfi civârında Eminsinan Mahallesinde tarîk-i hâssada köşede vâki‘ bir bâb nâ-tamam menzile varup cerîdede mazbûtü’l-esâmî Müslimîn huzûrlarında akd-i meclis-i şer‘-i Nebevî ettiklerinde ashâb-ı arzuhâl tarîk-i hass-ı merkūm erbâbından olup Dârü’s-sa‘âdeti’ş-şerîfe ağası nezâret-i aliyyelerinde âsûde evkāfdan merhûm Halil Efendi Vakfı müsakkafâtından bir bâb menzile bâ-temessük-ı mütevellî bi’l-icâreteyn iştirâken mutasarrıflar olan Tâcir Mahmud Ağa b. Mustafa kendi nefsinden asâleten zevcesi Hafife bt. Abdullah nâm hatun tarafından vekîl-i müsecceli olmağla vekâleten ve karşısında kâin kezâlik Dârü’s-sa‘âdeti’ş-şerîfe ağası nezâretlerinde olan âsûde evkāfdan merhûm el-Hâc Mustafa Ağa Vakfı müsakkafâtından bir bâb menzile bâ-temessük-ı mütevellî ber-vech-i iştirâk bi’l-icâreteyn mutasarrıflar olan Yahya Ağa b. Hasan nâm kimesne kendi nefsinden asâleten ve zevcesi Akile bt. Abdullah nâm hatun tarafından vekîl-i müseccel-i şer‘îsi olmağla vekâleten ve nezâret-i hazret-i Sadâret-penâhîde âsûde evkāfdan merhûm Şahkulu Mehmed Çelebi Vakfı müsakkafâtından bir bâb menziline bâ-temessük-ı mütevellî bi’l-icâreteyn mutasarrıf olan kalem-i kitâbetden es-Seyyid Yusuf b. el-Hâc Ahmed nâm kimesne asâleten ve nezâret-i dâ‘îlerinde âsûde evkāfdan merhûm Lütfü Bey Vakfı müsakkafâtından bir bâb menzile bâ-temessük-ı mütevellî müstakilleten bi’l-icâreteyn mutasarrıfe olan zâtı mu‘arrefe Şerîfe Âişe bt. Mehmed nâm hatun kezâlik asâleten meclis-i ma‘kūd-ı mezkûrda Dârü’s-sa‘âdeti’ş-şerîfe ağası nezâretlerinde âsûde evkāfdan mahalle-i mezbûrede Hamzapaşa Câmi‘-i şerîfinde müezzin olanlara süknâsı meşrût bir bâb menzile mutasarrıf olan derûn-ı arzuhâlde mezkûrü’l-ism Na‘lıncı Molla Mehmed b. Ahmed muvâcehesinde mârrü’l-beyân el-Hâc Mustafa Ağa Vakfı’nın mütevelliyesi Şerîfe Afife bt. el-Hâc Mustafa nâm hatun ve zikr olunan Şahkulu Mehmed Çelebi Vakfı’nın mütevellîsi es-Seyyid Ali Efendi b. Abdullah tarafından mürsel vekîli câbî-i vakf el-Hâc Mehmed Âtıf Efendi b. Abdullah ve sâlifü’z-zikr Lütfi Bey Vakfı’nın mütevellîsi el-Hâc Ebûbekir Efendi b. Hüseyin nâm kimesneler hâzır oldukları hâlde işbu derûnunda akd-i meclis-i şer‘-i âlî olunan merkūm Molla Mehmed bundan akdem menzil-i merkūmu yedimle müceddeden bir bâb menzil binâ ve inşâ edüp lâkin merkūm Yahya Ağa’nın menzili duvarının sağ cânibi tarafında olan sokak kapısı ref‘le mimârân-ı mezbûrân mesahalarıyla on sekiz parmak tarîk-i hass-ı merkūm tarafına tarîk-i has erbâbı izinlerinsiz vaz‘ eyleyüp mâ‘adâ menzil-i merkūmdan bizim menzillerimizin makarr-ı nisvân olan nerdübânbaşı ve oda ve sofalarımıza nezâret ve havâlesi olmağla nezâret ve havâlesini def‘a merkūm Molla Mehmed’e tenbîh olunmak murâdımızdır deyü bi’l-asâle ve bi’l-vekâle da‘vâ ettiklerinde mezbûr Molla Mehmed dahi cevâbında zikr olunan kapıyı ref‘le mahâll-i sâbıkına nakl ve vaz‘a ve ihdâs eylediği yedi aded pencerelerin birini külliyen sedd ü bend edüp mâ‘adâ altı aded pencerelerin önüne etrâfı gürgen ağacından ve bölmeleri eğrice kanadlığından yerli başlar mıhlı metîn ve müstahkem olarak kedi nerdübânı vaz‘ıyla nezâret ve havâlesini def‘a mezbûr Molla Mehmed ta‘ahhüd edüp onlar dahi ta‘ahhüdü kabûl ve bu vechile külliyen kat‘-ı münâza‘a eylediklerini kâtibûn-ı merkūmûn mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a alâ-vukū‘ihi inhâ ve takrîr eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 3 Ra sene 1237