İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 209 Hüküm no: 182 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalpakçı esnafından Yorgi v. Dimitri, Hristo v. Manol ve Yorgi v. Tanaş’ın, Mıgırdıç ve Gabril’e olan borçlarını ödemeyi taahhüt ettikleri Kalpakçı esnâfının kalpak derilerinden mu‘ârazadan men‘ Ma‘rûz[-ı dâ‘î-i devlet-i aliyyeleridir ki] Sâhib-i arzuhâl mukaddemâ Âsitâne-i aliyyede vâki‘ kalpakçı esnâfının Ermeni tâifesi ustabaşılarından olan Mıgırdıç v. Artin ve Gabril v. Yotgı nâm zimmîler evvelâ Çarşamba günü arz odasında huzûr-ı hazret-i Sadâret-penâhîde ve ba‘dehû du‘âhânemizde ma‘kūd meclis-i şer‘-i enverde esnâf-ı merkūmenin kethüdâları hâlâ Kürkçübaşı es-Seyyid el-Hâc Mehmed Ağa b. Hüseyin hâzır olduğu hâlde esnâf-ı merkūmenin Rum tâifesinden derûn-ı arzuhâlde isimleri mastûr Yorgi v. Dimitri ve Hristo v. Manol ve diğer Yorgi v. Tanaş nâm zimmîler muvâcehelerinde biz mikdâr-ı esnâf-ı merkūmenin ustabaşılarından iken bi’l-cümle esnâfa tevzî‘ içün ticâretden yirmi üç bin iki yüz otuz bir guruşa akdi nefsimize izâfetle iştirâ ve kabz eylediğimiz üç bin yüz yirmi altı çift siyah kalpak derilerinden iki bin yüz altmış üç çift derileri esnâf-ı merkūmenin Ermeni tâifesine tevzî‘ ve bey‘ ve teslîm ve semenleri olmak üzere iktizâ eden on üç bin altı yüz altı guruşu tamamen kabz etmemizle zikr olunan derilerden Rum tâifesine tevzî‘ etmek içün yedimizde tevkīf eylediğimiz dokuz yüz altmış üç çift kalpak derilerini mesfûrûn hâlâ ustabaşıları olmalarıyla yedimizden iştirâ ve Rum tâifesine tevzî‘ ve semenlerine iktizâ eden dokuz bin altı yüz yirmi beş guruş ve üç sene müddetde zikr olunan deriler içün kimesnenin emrinsiz oda kirâsına ve sâire mâlımızdan masrûfumuz olan dört bin dört yüz yetmiş yedi guruş ve ustabaşı olduğumuz müddetde zikr olunan derilerden mâ‘adâ âhara bey‘ eylediğimiz kalpak derisi esmânından Sakaçeşmeli Yorgi zimmî zimmetinde dört yüz yirmi dokuz guruş ve Petro zimmî zimmetinde yirmi dokuz guruş ve Kayıkçıoğlu zimmetinde doksan yedi guruş ve Gabril zimmetinde otuz iki buçuk guruş ve Kostandi zimmetinde on üç guruş ve Tatar Andon zimmetinde seksen dört buçuk guruş ve Tatar Avak zimmetinde kırk guruş alacak hakkımız olmağla ol vechile cem‘an on dört bin sekiz yüz yirmi yedi guruşu mâllarından bize def‘ ve teslîm eylesinler ba‘dehû meblağ-ı mezbûru kendi nefîsleri içün esnâf-ı merkūmenin Rum tâifesinden ve zimem-i mezkûremizi ashâbından kabz eylesinler deyü tasaddî eylediğimiz da‘vâmız şer‘an mesmû‘a olmayup yine zikr olunan yedimizde bâkī derileri dilediğimiz kimesneye bey‘ ve zimem-i mezkûreyi ashâbından taleb etmemiz iktizâ eylediği bize tefhîm ol vechile mesfûrûn Yorgi ve Hristo ve diğer Yorgi zimmîlere da‘vâ-yı mezkûremize bî-vech-i şer‘î mu‘ârazadan men‘ olunduğumuzdan sonra kethüdâmız hâzır-ı merkūm ve sâir mazbûtü’l-esâmî ustalar vesâtetiyle beynimiz tevfîk ve ıslâh olunup zimem-i mezkûremizden zikr olunan Sakaçeşmeli Yorgi zimmetinde meblağ-ı mezbûr dört yüz yirmi dokuz guruş da‘vâmızdan meccânen fâriğler olup mâ‘adâ zimemimizi dahi şer‘an ashâbından taleb etmek üzere zikr olunan derilerden ancak yedimizde mevcûd sekiz yüz altmış guruş ki cem‘an üç bin on guruşa tarafeynden bi’l-îcâb ve’l-kabûl bi-safkatin vâhidetin mesfûrûn Yorgi ve Hristo ve diğer Yorgi zimmîlere bi’t-terâzî bey‘ ve temlîk ve teslîm eylediğimizde onlar dahi iştirâ ve temellük ve tesellüm ve kabz eylediklerinden sonra semenleri meblağ-ı merkūm üç bin on guruşu bize edâ etmek üzere her biri ta‘ahhüd eylediler deyü mesfûrân Mıgırdıç ve Gabril zimmîlerin ikrâr u i‘tirâflarını mesfûrûn Yorgi ve Hristo ve diğer Yorgi zimmîler tasdîk ve meblağ-ı merkūm üç bin on guruş semen-i mebî‘-i mezkûrdan zimmetlerinde deynleri olduğunu ikrâr ve ber-vech-i meşrûh edâya ta‘ahhüd edüp ol vechile kat‘-ı nizâ‘ eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 15 S sene 1237