İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 208 Hüküm no: 181 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yorgi ile Yani v. Yorgi’nin Hasan Bey b. Mustafa’ya olan borcunu kefilleri Yağcı Dimitri v. Yorgi’nin ödemesi gerektiği Yağcı bakkālı kefâlete üç yüz altmış guruşu edâya ta‘ahhüdü Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden Hasan Bey b. Mustafa nâm kimesne zevce-i menkûhası zâtı mu‘arrefe Emine Hatun bt. Ömer hâzır olduğu hâlde evvelâ Çarşamba günü arz odasında huzûr-ı hazret-i Sadâret-penâhîde ve ba‘dehû du‘âhânemizde ma‘kūd meclis-i şer‘-i münîrde derûn-ı arzuhâlde mastûrü’l-ism Yağcı Dimitri v. Yorgi zimmî muvâcehesinde ben işbu târihden sekiz sene mukaddem mâlımdan İstanbul’da Balık pazarı kapısı hâricinde mütemekkinler hâlâ gāibûn ani’l-beled Yağcı bakkālı esnâfından Moralı Nikola v. Yorgi ve Yani v. Yorgi ve Todori v. Dimitri ve Kostandi v. Yorgi nâm zimmîlere iştirâken her biri âharın zimmetine lâzım gelen meblağa kefîl bi’l-mâl olarak dört bin guruş ikrâz ve teslîm onlar dahi iktirâz ve kabz ve istihlâk edüp ol vechile mesfûrûnun zimmetlerinde alacak hakkım olan meblağ-ı mezbûr dört bin guruşa mesfûr Dimitri zimmî müstakillen kefîl bi’l-mâl ve dâmin olunduktan sonra meblağ-ı mezbûr gāibûn-ı mezbûrûnun zimmetlerinde bana deynleri olduğunu ve mesfûr Dimitri zimmînin kefâlet-i merkūmesini nâtık yedime i‘tâ eyledikleri bir kıt‘a temessükü [36a] bin iki yüz otuz beş senesi Şevvâli’l-mükerremi gurresinde tecdîd ve yedime iş bu bir kıt‘a diğer temessükü i‘tâ eylediklerinde mesfûr Dimitri zimmî kefâlet-i mezkûreyi tahrîr etmemiş olup ve meblağ-ı mezbûru asıl ve kefîllerinden biri kable’l-edâsına sâbıkāda zuhûr eden hıyânetlerine binâen mesfûr Dimitri zimmîden taleb ederim deyü da‘vâ eylediğimde ol dahi cevâbında meblağ-ı mezbûr dört bin guruşa ber-vech-i muharrer kefâlet-i sâbıkāsını ikrâr lâkin sen ber-vech-i muharrer tecdîd-i temessük eylediğin târih-i merkūmede beni kefâletden ihrâc etmekle meblağ-ı mezbûrdan zimmetim berîe olmuşdur deyü kefâlet-i merkūmeden ihrâcımı da‘vâ ile inkârıma mukārin eylediği def‘ini isbât sadedinde iken esnâf-ı merkūme pazarbaşısı ve nizâm ustaları beynimize tavassut-birle zimmî-i mesfûru ırzâ eylediklerinde mesfûr Yağcı Dimitri dahi gāibûn-ı mesfûrûn Nikola ve Yani ve Todori ve Kostandi zimmîler zimmetlerinde cihet-i mezkûreden alacak hakkım olan meblağ-ı mezbûr dört bin guruşu işbu târih-i i‘lâmdan beher şehr yüz guruşdan cem‘an kırk ay tamamında müctemi‘an bana edâ etmek üzere müceddeden kefîl bi’l-mâl ve dâmin oldukda ben dahi kefâlet-i mezkûreyi ba‘de’l-kabûl yine mâlımdan semeni işbu târih-i i‘lâmdan bir sene tamamına değin müeccelen mesfûr Dimitri zimmîye bey‘ ve teslîm ol dahi iştirâ ve kabz eylediği bir hilâlî sa‘at semeninden mesfûr Dimitri zimmî zimmetinde alacak hakkım olan üç yüz altmış guruşu dahi kezâlik târih-i i‘lâmdan beher şehr otuzar guruşdan bir sene tamamına değin bana edâya ta‘ahhüd eylediğinde ben dahi râzı oldum deyü eylediği ikrâr u i‘tirâfını mesfûr Dimitri zimmî tasdîk ve meblağ-ı merkūm dört bin guruşa târih-i mezkûrdan beher şehr yüzer guruşdan kırk ayda edâ etmek üzere müceddeden kefîl bi’l-mâl ve dâmin olduğunu ve semen-i mebî‘-i mezkûr üç yüz altmış guruşu târih-i mezkûrdan beher şehr otuzar guruşdan bir sene tamamına değin edâya ta‘ahhüd eylediğini tâyi‘an ikrâr u i‘tirâf ve ber-vech-i muharrer edâya müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 19 Ra sene 1237