İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 220 Hüküm no: 195 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülmezoğlu Ohannes ve kardeşi Bedros v. Anton’un malik oldukları oda gediğini Maryana bt. Andon’a sattıkları Oda gediği Ma‘rûz[-ı dâ‘î-i devlet-i aliyyeleridir ki] Zikri âtî oda gediğine iki kıt‘a sûret mûcebince nısfiyet üzere iştirâken mâlikler olan Gülmezoğlu Ohannes ve karındaşı Bedros v. Anton nâm zimmîler İstanbul mahkemesinde meclis-i şer‘-i münîrde ve li-ebeveyn kız karındaşları Maryana bt. el-mersûm Andon nâm Nasrâniye tarafından husûs-ı âtîde tasdîka vekîl-i şer‘îsi han odabaşısı Markor v. Delot nâm zimmî muvâcehesinde defterdâr-ı esbak merhûm Abdüsselam Efendi Vakfı müsakkafâtından İstanbul’da Nuruosmaniye Câmi‘-i şerîfi kurbünde Yağcı Hanı demekle arîf bir bâb hanın tabaka-i vustâsında tahtahan tarafında kâin nerdübândan üçüncü köşede vâki‘ şehriye sekiz guruş kirâ-yı kadîmeli bir bâb oda derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme akd-i âti’z-zikrin sudûruna değin başka başka iki kıt‘a sûret ile nısfiyet üzere iştirâken yedimizde mâlımız ve mülkümüz olmağla hâlâ biz ber-vech-i muharrer iştirâken mâlikler olduğumuz gedik tâ‘bir olunur âlât-ı lâzıme-i mezkûrenin mecmû‘unu tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin bin beş yüz [guruş] semen-i medfû‘ ve makbûza kız karındaşımız müvekkile-i mersûme Maryana Nasrâniye’ye bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ ba‘d zikr olunan gedik âlâtının mecmû‘unda alâka ve medhalimiz kalmayup kız karındaşımızın müvekkile-i mersûme Marya Nasrâniyenin mülk-i müşterâsı olmuşdur deyü ba‘de’l-ikrâr ve’t-tasdîk zikr olunan oda gediğinin bâyi‘ân-ı mersûmânın yedlerinde olan iki sûret mûcebince üzerlerinde başka başka kayd-ı atîki ref‘ ve terkīn ve kız karındaşları müşteriye-i mersûme Marya Nasrâniye ismine tashîhan kayd ile yedine müstakillen bir kıt‘a sûret i‘tâsı bâbında istid‘â-yı inâyet eyledikleri mahkeme-i mezbûreden huzûr [-ı âlîlerine i‘lâm olundu.] Fî 8 R sene 1237