İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 219 Hüküm no: 194 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mustafa Efendi b. Mehmed’in nizama aykırı davranması sebebiyle debbâğ esnaflığından çıkarıldığı Esnâfdan ihrâc Mukābele şüd Ma‘rûz[-ı dâ‘î-i devlet-i aliyyeleridir ki] Âsitâne-i aliyyede Yedikal‘a [Yedikulle] hâricinde kâin debbâğ esnâfının kethüdâları Hasan Usta ve Yiğitbaşı es-Seyyid Ahmed Efendi ve müsin ve ihtiyârlarından el-Hâc Mustafa Ağa ve diğer el-Hâc Mustafa Ağa ve el-Hâc İsmail Ağa ve esnâflarından Mustafa Usta ve Halil Usta ve İsmail Usta ve el-Hâc Halil Usta ve Derviş Mehmed Efendi ve Ali Molla ve Hüseyin Efendi ve Mehmed Usta ve es-Seyyid Mustafa Usta ve Mehmed Emin Efendi ve sâirleri meclis-i şer‘-i münîrde yine esnâf-ı merkūmeden Kayyım Şeyh Mustafa Efendi b. Mehmed nâm kimesne muvâcehesinde merkūm Şeyh Mustafa Efendi esnâfımızdan olup lâkin dâimâ esnâfımızın nizâm-ı kadîmimize mugāyir hareket-birle ihtilâl-i nizâm[a] mûcib ef‘âle tasaddî ederek beyne’l-esnâf şikāka bâ‘is olup ol vechile nizâmımız üzere kethüdâ ve ahîbaba ve müsin ve ihtiyârlarımız merraten ba‘de uhrâ kendüye nush ü pend eylediğimizde bir vechile itâ‘at ve inkıyâd ve kelâmlarımıza iltifât etmeyüp yine ef‘âl-i sâbıkāsında ısrârı esnafımızın perîşan olmasına bâdî ve memûr olduğumuz umûr-ı mühimmenin idâresinde sekte-i ibrâ-i semene müeddî olmağla merkūm Şeyh Mustafa fîmâ ba‘d nizâm-ı kadîmimize ri‘âyet etmediği takdîrce debbâğlık umûruna müdâhale etmeyüp esnâfımızdan ihrâc olunması cümlemizin matlûbumuzdur deyü bi’l-muvâcehe teşekkî-birle merkūm Şeyh Mustafa’nın esnâf-ı merkūmeden hurûcunu iltimâs eyledikleri İstanbul Bâb mahkemesinden huzûr [-ı âlîlerine i‘lâm olundu.] Fî-gurre-i sene 1237