İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 221 Hüküm no: 197 Orijinal metin no: [38a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tümen v. Eremya’nın, ipekçi dükkanı gediğini Çiçilya bt. Haçador ve Viçen v. Serope’ye sattığı Kazzâz gediği Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin kazzâz esnâfından Ohannes nâm zimmî meclis-i şer‘-i şerîf-i enverde yine kazzâz esnâfından Tümen v. Eremya nâm zimmî muvâcehesinde kazzâzlar kethüdâsı Abdüllatif Ağa ve Yiğitbaşı Mehmed ve nizâm ustalarından Sakızlıoğlu Begos ve Ketencioğlu Kirkor zimmîler ve Yasef Yahûdi [38b] hâzır oldukları hâlde mahmiye-i mezbûrede Çarşı-yı Kebîr’de peçeciler sûkunda Kazzâz Andon ve Kazzâz Samyel dükkânları beynlerinde vâki‘ bir kepenk bir bâb kazzâz dükkânı derûnunda mevcûde akd-i âti’z-zikrin sudûruna değin bir kıt‘a sûret mantûkunca bir gedik i‘tibâriyle yedimde mâlım ve mülküm olan beyne’l-esnâf gedik tâ‘bir olunur âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin mersûm Tümen zimmîye dört bin guruş semen-i medfû‘ ve makbûza bey‘ ve temlîk ve teslîm ol dahi ber-minvâl-i muharrer yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d âlât-ı lâzıme-i mezkûre mersûm Tümen zimmînin mâl-ı müşterâsı olup benim kat‘an alâka ve medhalim kalmamışdır deyü ba‘de’l-ikrâr ve’t-tasdîk mesfûr Tümen zimmî meclis-i şer‘-i enverde hâlâ zevcesi Çiçilya bt. Haçador nâm Nasrâniye tarafından husûs-ı âtîde tasdîka vekîl-i şer‘îsi Agob v. Abraham zimmî ile Kazzâz Viçen v. Serope nâm zimmî muvâcehelerinde ben dahi ânifen şirâen mâlik olduğum sâlifü’z-zikr gedik tâ‘bir olunur âlât-ı lâzıme-i mezkûrenin nısf-ı şâyi‘ini zevcim müvekkile-i mersûme Çiçilya Nasrâniyeye iki bin guruşa ve nısf-ı şâyi‘-ı âharını mersûm Viçen zimmîye kezâlik iki bin guruş ki cem‘an dört bin guruş semen-i medfû‘ ve makbûza tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin bey‘ ve temlîk ve vech-i lâyıkı üzere teslîm eylediğimde onlar dahi iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika da‘vâdan her birerlerimiz âharın zimmetini kabûlü hâvî kezâlik ibrâ ve iskāt dahi etmemizle fîmâ ba‘d âlât-ı muharrere-i mezkûrenin nısf-ı şâyi‘i zevcem müvekkile-i mezbûre Çiçilya Nasrâniyenin ve nısf-ı şâyi‘-ı âharı mersûm Viçen zimmînin mülk-i müşterâları olup benim dahi kat‘an alâka ve medhalim kalmamışdır deyü kezâlik ba‘de’l-ikrâr ve’t-tasdîk gedik-i mezkûr bâyi‘-i evvel-i mersûm Ohannes zimmînin üzerinden ref‘ ve terkīn ve ba‘dehû mersûm Tümen zimmîden iştirâ eden zevcesi müvekkile-i mersûme Çiçilya Nasrâniye ile mersûm Viçen zimmî isimlerine nısfiyet üzere tashîh ve kayd birle şürûtları üzere kaleminden başka başka birer kıt‘a sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 8 R sene 1237