İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 222 Hüküm no: 198 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maydoslu Acı Kostandi v. Sava’nın, Seyyid Ahmed Beyefendi’nin zimmetini ibrâ ettiği Keşf, 2.600 guruşa hüküm Bâ-imzâ ve bâ-mühr nâib efendi hazretlerinindir işbu i‘lâm yukarının siciline sehven kaydolmağla işbu mahalle şerh verildi. Ma‘rûz[-ı dâ‘î-i devlet-i aliyyeleridir ki] Neccâr kalfalarından derûn-ı arzuhâlde mezkûrü’l-ism Maydoslu Acı Kostandi v. Sava nâm zimmî İstanbul Bâb Mahkemesinde meclis-i şer‘-i enverde muhâsebe-i evvel kalemi küttâbından ıstabl-ı âmire kâtibi vekîli sâhib-i arzuhâl es-Seyyid Ahmed Beyefendi b. es-Seyyid Mehmed Emin Efendi b. es-Seyyid Ahmed tarafından husûs-ı âtîde vekîl olduğu Mehmed Necib Efendi b. Hâfız Ali ve Mustafa Münib Efendi b. Yusuf şehâdetleriyle ber-nehc-i şer‘î sâbit olan Yorgânî Mehmed Emin Ağa b. İbrahim mahzarında ben bundan akdem mîr-i mûmâ-ileyhin bi-şartü’r-rücû‘ emriyle İstanbul’da Samatya kurbünde Hâce Kadın Mahallesinde vâki‘ mutasarrıf olduğu ma‘lûmü’l-hudûd bir bâb harâb menzilini hedm-birle enkāz-ı mevcûdesini sarf ve müdde‘âsını kendi mâlımdan tekmîl ederek müceddeden bir bâb binâ ve inşâ etmemle menzil-i mezkûrun ma‘a saçak iki yüz doksan dört zirâ‘ ebniyesine mâlımdan masrûfum olan on bir bin yedi yüz altmış guruş ve on sekiz zirâ‘ kârgîr matbahına kezâlik mâlımdan masrûfum olan dört yüz elli guruş ve elli buçuk zirâ‘ moloz ve taş duvarlarına kezâlik mâlımdan masrûfum olan dört yüz otuz sekiz guruş otuz para ve orta kapı havâle perdesine kezâlik mâlımdan verdiğim elli guruş ki min-haysü’l-mecmû‘ bi’l-mürâca‘a alacak hakkım olan on iki bin altı yüz doksan sekiz guruş otuz paranın yedi bin beş yüz elli iki guruşunu ceste ceste müvekkil-i mîr-i mûmâ-ileyh yedinden kabz etmemle bâkī zimmetinde kalan beş bin yüz kırk altı guruş otuz parayı müvekkil-i mîr-i mûmâ-ileyhden taleb ederim deyü da‘vâ eylediğimde ol dahi cevâbında ber-vech-i muharrer emriyle menzil-i mezkûru kendi mâlımla enkāz-ı mevcûdesini sarf ve mâ‘adâsını tekmîl ederek müceddeden binâ ve inşâ eylediğimi ikrâr lâkin masrûfun ol mikdâra bâliğ olmamışdır dedikde menzil-i mezkûr bu def‘a ma‘rifet-i şer‘ ve hâssa mimarı ağa ma‘rifetiyle mahallinde keşf ve mesâha ve takdîm olundukta ber-mûceb-i defter-i keşf menzil-i mezkûrun ebniyesi on bir bin dört yüz doksan dört buçuk guruşa bâliğ ve bin iki yüz guruşu enkāz-ı ânife-i maktû‘ası içün ve iki yüz elli guruşu nâkıs kalan mahaller içün ihrâc olunup mâ‘adâ mâlımdan masrûfum on bin kırk dört buçuk guruş olduğunu tahakkuk ve ber-vech-i meşrûh ceste ceste müvekkil-i mîr-i mûmâ-ileyhin tasdîkiyle makbûzum olan yedi bin beş yüz elli iki guruş dahi ba‘de’t-tenzîl bâkī zimmetinde zuhûr eden iki bin dört yüz doksan iki buçuk guruş üzerine rızâsıyla yüz yedi buçuk guruş dahi zamla cem‘an iki bin altı yüz guruşa iblağ ve bana teslîm müvekkil-i mîr-i mûmâ-ileyhe izâfetle vekîl-i mezbûr Mehmed Emin Ağa bi’l-vekâle müte‘ahhid olmağla ben dahi ziyâde iki bin beş yüz kırk altı guruş otuz para masraf-ı müdde‘âma ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i de‘âvî ve kâffe-i mutâlebâtdan müvekkil-i mûmâ-ileyh es-Seyyid Ahmed Beyefendi’nin zimmetini ibrâ-i âmm-ı sahîh-i şer‘î ile bi’l-asâle ibrâ ve iskāt eylediğimde vekîl-i mezbûr dahi müvekkiline izâfetle kezâlik husûs-ı mezkûra ve hukūk-ı sâire-i şer‘iyyeye müte‘allika âmme-i de‘âvîden bi’l-vekâle benim zimmetimi ibrâ ve iskāt ve tarafeynden her birimiz âharın ibrâsını asâleten ve vekâleten kabûl eyledik dediğini vekîl-i mezbûr Mehmed Emin Ağa tasdîk ve ber-vech-i meşrûh kabûlü hâvî bi’l-vekâle ibrâ eylediğini ve ibrâdan istisnâ olunan meblağ-ı mezkûr iki bin altı yüz guruş müvekkil-i mîr-i mûmâ-ileyhin zimmetinde deyni olduğunu ikrâr u i‘tirâf ve edâya müte‘ahhid olduğu huzûr [-ı âlîlerine i‘lâm olundu.] Fî 17 min-Rebî‘ülâhir sene 1237