İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 224 Hüküm no: 200 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takfor v. Norsoz’un tuhafiyeci gediğini Arus bt. Karabet’e sattığı Tuhafcı gediği Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ tuhafcı ve fincancı esnâfından Takfor v. Norsoz nâm zimmî meclis-i şer‘-i münîrde esnâf-ı merkūme yiğitbaşısı Menteş v. Avram Yahûdi hâzır olduğu hâlde İstanbul’da Fenerkapısı dâhilinde Kiremit Mahallesi’nde mütemekkine bâ‘isetü’l-i‘lâm Arus bt. Karabet nâm Nasrâniye-i zimmîyenin li-ebeveyn karındaşı ve tarafından husûs-ı âtîde vekîli tuhafcı () nâm zimmî muvâcehesinde takrîr-i kelâm edüp İstanbul’da Kazgancılar başında Alâiyeli Hüseyin Ağa konağı tahtında Mercan mahzenine muttasıl tuhafcı ve fincancı mahzeni derûnunda mevcûde başmuhâsebede mukayyed gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan bir destgâh ve bir kafes ve sâir âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin müvekkile-i mersûme Arus Nasrâniyeye üç bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle ba‘de’l-yevm âlât-ı lâzıme-i merkūmede benim aslâ ve kat‘â alâka ve medhalim kalmayup müvekkile-i mersûme Arus Nasrâniyenin mülk-i müşterâsı olmuşdur deyü ba‘de’l-ikrâr ve’t-tasdîk âlât-ı lâzıme-i mezkûrenin kaleminde mesfûr Takfo zimmî üzerinde olan kaydı ref‘ ve terkīn-birle müvekkile-i mersûme Arus Nasrâniye ismine kayd ve yedine müceddeden bir kıt‘a sûret i‘tâsı bâbında istid‘â-yı inâyet etmekle istid‘âsı üzere gedik-i mezkûrun mesfûr zimmî üzerine olan kaydı ref‘ ve müşteriye-i müvekkile-i mersûme Arus Nasrâniye ismine kayd ile sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 20 R sene 1237