İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 223 Hüküm no: 199 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed’in, Yedikule’deki üç bâb kasap dükkânı gediğini Seyyid İbrahim Ağa’ya sattığı Kasab gediği Mukābele şüd Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân hazretlerinin evkāf-ı hümâyûnlarından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden beşinci selhhâneye merbût kasab dükkânlarından İstanbul’da Kocamustafapaşa Câmi‘-i şerîfi karşısında kâin bir bâb ve yine câmi‘-i şerîf-i mezkûr kapısı civârında vâki‘ bir bâb ve yine Kocamustafapaşa kolluğu karşısında kâin bir bâb ki cem‘an üç bâb kasab dükkânları derûnlarında mevcûde beyne’l-esnâf gedik tâ‘bir olunur âlât-ı lâzıme-i ma‘lûmelere bâ-temessük-ı mütevellî bi’l-icâreteyn mutasarrıf olan es-Seyyid Ahmed b. İbrahim nâm kimesne tarafından husûs-ı âti’l-beyânda ikrâra vekîl olduğu kasab ustalarından es-Seyyid Hasan Efendi b. es-Seyyid Mehmed ve kasab ustalarından Mehmed Ağa b. Hasan nâm kimesneler şehâdetleriyle sâbit olan el-Hâc Ali Ağa b. el-Hâc Osman nâm kimesne meclis-i şer‘-i münîrde hâlâ hâssa kasabbaşısı hâcegân-ı dîvân-ı hümâyûndan es-Seyyid Ali Efendi tarafından mürsel kasablar kethüdâsı Hasan Ağa b. el-Hâc Osman ve sâir kasab ustaları hâzır oldukları hâlde kasab ustalarından bâ‘isü’l-i‘lâm es-Seyyid el-Hâc İbrahim Ağa b. es-Seyyid Mustafa nâm kimesne muvâcehesinde bi’l-vekâle takrîr-i kelâm edüp müvekkilim merkūm es-Seyyid Ahmed b. İbrahim zikr olunan kassab dükkânları derûnlarında mevcûde âlât-ı lâzıme-i ma‘lûmelerimi bedel-i ma‘lûm ve makbûz mukābelesinde ferağ-ı kat‘i-i mu‘teber ile bâ-re’y-i mütevellî mezbûr el-Hâc İbrahim Ağa’ya ferağ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘lerini ustalar ma‘rifetleriyle tamamen ahz etmek üzere ta‘ahhüd edüp fîmâ ba‘d kasab gediği tâ‘bir olunan âlât-ı lâzıme-i mezkûrelerde benim kat‘â alâka ve medhalim kalmayup mezbûr es-Seyyid el-Hâc İbrahim Ağa’nın hakk-ı müfevvezi olmuşdur dedi deyü bi’l-vekâle eylediği takrîrini mezbûr es-Seyyid el-Hâc İbrahim Ağa ba‘de’t-tasdîk zikr olunan üç bâb kasab dükkânları gedikleri merkūm es-Seyyid Ahmed’in ferağından kendi üzerine tahrîr ve defter-i vakfa kayd ve yedine taraf-ı vakıfdan temessük i‘tâ buyrulmak bâbında istid‘â-yı inâyet eylediği İstanbul Mahkemesi’nden huzûr [-ı âlîlerine i‘lâm olundu.] Fî 18 R sene 1237