İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 226 Hüküm no: 202 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyükdereli Ahmed Çavuş ile Kasımpaşalı Hasan Çavuş’un izinsiz açtıkları iki bâb fırancılacı fırının kapatılması Büyükdere’de muhdes fırınlar i‘lâmı Mukābele şüd Ma‘rûz[-ı dâ‘î-i devlet-i aliyyeleridir ki] Büyükdere’de Dereağzı sokağında bilâ-izn iki bâb francalacı fırını küşâd eden Büyükdereli Ahmed Çavuş ve Kasımpaşalı Hasan Çavuş nâm kimesnelerin sâlifü’z-zikr bilâ-izn küşâd eyledikleri iki bâb francalacı fırınları ba‘de’t-tahkīk sedd ü bend ve derûnlarında olan âlât-ı lâzımesinin bi’l-külliye hedm ve tahrîbi husûsu ol havâlî muhâfazasına memûr Hüdâvendigâr sancağı mutasarrıfı vezîr-i mükerrem devletlü inayetlü İbrahim Paşa hazretlerine iş‘âr olunmuş olduğuna binâen vezîr-i müşârun-ileyh hazretleri dahi hedm ve tahrîbi fermân buyrulan iki bâb muhdes francalacı fırınları Büyükdere’de mevcûd nizâmda dahi iki bâb fırınlardan olmayup tahrîbi irâde buyrulan fırınlar kangısı olduğunu tahkīk ve tavzîh olunmasını lede’l-isti‘lâm şürût-ı nizâma dâhil olmayarak merkūmân Ahmed Çavuş ve Hasan Çavuş nâm kimesnelerin bi-gayr-ı izin küşâd eyledikleri fırınlar tahkīk olunmak bâbında bâlâsı sahh-ı âlî ile muvaşşah beyâz üzerine bu dâ‘îlerine hitâben sâdır olan fermân-ı âlîlerine imtisâlen husûs-ı mezkûru tahkīk içün habbâzân kethüdâsı ve francalacılar ustabaşıları olan mazbûtü’l-esâmî kimesnelere taraf-ı dâ‘iyânemden mu‘temed adamlar terfîk ile mahallerinde tahkīk ve tefahhus olundukta bin iki yüz otuz senesi hılâlinde bâ-hatt-ı hümâyûn-ı itâ‘at-makrûn küşâdı irâde buyrulan fırınlardan Büyükdere’de İspanya ve Fransa ve Nemçe elçilerine müştereken bir bâb ve çarşı [39b] fırını demekle ma‘rûf bir bâb ki cem‘an iki bâb francalacı fırını el-yevm mevcûd ve zikr olunan İspanya ve Fransa ve Nemçe elçilerine müşterek olup hâlâ şirketden vâreste olarak bâ-buyruldu müstakillen Nemçelüye tahsîs olunan francalacı fırını mârrü’l-beyân Büyükdere’de Dereağzı sokağında İspanya sarayı bahçesi karşısında Nemçe Sarayı derûnunda vâki‘ ve el-yevm francala tabh ve i‘mâl olunmakda ve yine Habbâz Mikail nâm zimmînin gediğine mâlik olduğu mahâll-i merkūmda kalafat yeri nâm mahalde deryâya nâzır tarafeyni Yanko ve Tavukçu Yorgi zimmîler şerbethâneleri beynlerinde kâin çarşı fırını demekle bilinir ve sâir ibâdullâh içün bir bâb ki hâlâ iki bâb nizâmda dâhil francalacı fırını mekşûflar olup bunlardan mâ‘adâ mârru’z--zikr Dereağzı sokağında Nemçelüye tahsîs kılınan sâlifü’z-zikr fırın ittisâlinde İspanya sarayı bağcı [bahçesi] karşısında mukaddemâ konsolos Kiryako nâm müste’men arsasında Büyükdereli merkūm Ahmed Çavuş nâm kimesne ile Sakızlı Mihal nâm zimmînin hâric ez nizâm bilâ-izn küşâd eyledikleri bir bâb ve yine mahâll-i mezbûrda tarafeyni Moskov sarayı ve Aynîkızı menzili ile mahdûd deryâya nâzır Beyoğlu’nda mütemekkin Moskov teba‘asından Kokono Nanu nâm Nasrâniyenin menzili bahçesi derûnunda Kasımpaşalı Hasan Çavuş nâm kimesne ile İngiltere himâyesinde Petraki nâm müste’menin kezâlik bilâ-izn küşâd eyledikleri bir bâb ki cem‘an hedm ve tahrîbi fermân buyrulan iki bâb muhdes francalacı fırınları şürût-ı nizâm-ı merkūma dâhil olmayup el-yevm muhâfız-ı müşârun-ileyh hazretleri ma‘rifetiyle kapatılmış olan sâlifü’z-zikr iki bâb fırın idüğü tahkīk olunduğu imtisâlen li’l-emri’l-âlî İstanbul Mahkemesi’nden huzûr [-ı âlîlerine i‘lâm olundu.] Fî 14 R sene [12]37