İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 228 Hüküm no: 205 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi Begos v. Mıgırdıç’ın, Takohi bt. Anton’a olan borcunu taksitle ödeyeceğini taahhüt ettiği Beher şehr 62 guruş edâya ta‘ahhüd mecmû‘u 812,5 guruş Mukābele şüd Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mastûratü’l-ism Takohi bt. Anton nâm Nasrâniyenin zevci olup tarafından husûs-ı âtîde taleb ve da‘vâ ve ahz ü kabz ve lede’l-iktizâ sulh ve ibrâya ve mütevakkıf olduğu umûrun küllîsine vekâlet-i âmme ile vekîl olduğu şahsını bilir Kılâbdâncı Karabet v. Markar ve Bezzâz Kigork v. Artin zimmîler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Kılâbdâncı Hayem oğlu Petrak v. Komestilanos nâm zimmî meclis-i şer‘-i münîrde sâhib-i arzuhâl Kazzâz Begos v. Mıgırdıç nâm zimmî muvâcehesinde mahmiye-i İstanbul’da Tahtelkal‘a kurbünde na‘lburlar karşısında kâin bir tarafdan fesci ve bir tarafdan bezci dükkânları beynlerinde vâki‘ bir kepenk bir bâb kazzâz dükkânı derûnunda mevcûde beyne’l-esnâf gedik tâ‘bir olunur başmuhâsebe kaleminde mukayyed âlât-ı lâzıme-i ma‘lûme mukaddemâ mesfûr Kazzâz Begos zimmînin yedinde mâlı ve mülkü iken âlât-ı lâzıme-i mezkûreyi müvekkilem mersûme Takohi Nasrâniyeye işbu yedimde olan bin iki yüz otuz üç senesi Şa‘bâni’l-mu‘azzamının on ikinci günü târihiyle müverrah bir kıt‘a sûret mantûkunca tarafeynden bi’l-îcâb ve’l-kabûl bâtten ve sahîhan bi-safkatin vâhidetin beş bin guruş semen-i medfû‘ ve makbûza bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl ve mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ba‘de’l-ibrâ mesfûr Kazzâz Begos zimmî âlât-ı muharrere-i merkūmede kendinin kat‘â alâka ve medhali kalmayup müvekkilem mesfûrenin mülk-i müşterâsı ve hakk-ı sırfı olduğunu ikrâr u i‘tirâf dahi edüp ol vechile âlât-ı mezkûrede mesfûrun alâkası kalmayup müvekkilem mesfûrenin mülk-i müşterâsı oldukdan sonra yedinde iken müvekkilem mersûme zikr olunan gedik âlâtını sene-i merkūme şehr-i Ramazani’l-mübâreği gurresinden aded-i şuhûr beyân olunmaksızın beher şehr altmış ikişer buçuk guruşa mesfûr Kazzâz Begos zimmîye îcâr ve teslîm ol dahi istîcâr ve kabz edüp gurre-i şehr-i merkūmdan işbu târih-i i‘lâm senesi şehr-i Rebî‘ülevveli gāyetine gelince kırk üç ay müddet taht-ı icâresinde olup gāyet-i şehr-i mezbûrda fesh-i akd-i îcâr etmeleriyle müddet-i mezkûrede ücret-i merkūmeden müctemi‘a cem‘an iki bin altı yüz seksen yedi buçuk guruş ki bin dört yüz otuz yedi buçuk guruşunu mesfûr Begos zimmî müvekkilem mersûmeye ceste ceste edâ ve teslîm ol dahi yedinden ahz ü kabz ve istîfâ etmekle bâkīsi olan bin iki yüz elli guruşunu müvekkilem mesfûre içün bi’l-vekâle hâlâ talep ederim deyü mesfûr Begos zimmîden da‘vâ eylediğimde ol dahi cevâbında da‘vâ-yı mezkûremi bi-tamâmihâ tâyi‘an ve kat‘iyyen ikrâr u i‘tirâf edüp lâkin ben âlât-ı mezkûreyi müvekkile-i mersûme yedinden ikrâr ve kabz eylediğim meblağ-ı mezbûr beş bin guruş [40a] deynim mukābelesinde rehin ve teslîm ve ba‘dehû istîcâr etmemle meblağ-ı mezbûru edâ ve fekk-i rehn ile âlât-ı mezkûreyi taleb ederim deyü âlât-ı mezkûreyi semen-i merkūma bâtten ve sahîhan müvekkilem mersûmeye bey‘ ve teslîm ve tağrîr ve gabnine müte‘allika da‘vâdan her birimiz âharın zimmetini kabûlü hâvî ba‘de’l-ibrâ âlât-ı mezkûre müvekkilem mersûmenin mülk-i müşterâsı olup kendinin kat‘â alâkası kalmadığını târih-i merkūmede ikrâr dahi eylediğini hâlâ ber-vech-i muharrer i‘tirâf eder iken takrîr-i meşrûhu üzere tasaddî eylediği rehniyet da‘vâsı şer‘an mesmû‘a olmayup ikrârı mûcebince meblağ-ı bâkī-i merkūm bin iki yüz elli guruşu zevcem müvekkile-i mersûme Takohi Nasrâniyeye edâsı lâzım geldiği mesfûr Begos zimmîye ba‘de’t-tefhîm bâ-vesâtet-i muslihîn ben meblağ-ı bâkī-i mezkûr bin iki yüz elli guruşun dört yüz otuz yedi buçuk guruşunu zevcem müvekkile-i mersûmeye izâfetle bi’l-vekâle sulhan hat ve tenzîl eylediğimde bâkīsi olan sekiz yüz on iki buçuk guruşdan mâ‘adâ hat ve tenzîl eylediğimiz meblağ-ı merkūm dört yüz otuz yedi buçuk guruşa ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan ibrâ-i âmm-ı sahîh-i şer‘î ile zevcem müvekkile-i mersûmeye izâfetle mersûm Begos zimmînin zimmetini bi’l-vekâle ibrâ ve iskāt eylediğimde mesfûr Begos zimmî dahi bi’l-cümle zikr olunan gedik âlâtı husûsuna ve işbu târih-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan şürût-ı müfside ve uhûd-ı mübtileden ârî ve cebr ü kerh ve muvâza‘adan berî ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile zevcem müvekkile-i mersûme Takohi Nasrâniyenin ve benim zimmetimi ibrâ ve iskāt ve her birimiz asâleten ve vekâleten ber-vech-i muharrer âharın ibrâsını ba‘de’l-kabûl ibrâdan müstesnâ meblağ-ı bâkī-i merkūm sekiz yüz on iki buçuk guruşu işbu târih-i i‘lâmdan yedi ay tamamında zevce-i müvekkile-i mersûme içün bana edâ etmek üzere mesfûr Begos zimmîyi bi’l-vekâle ba‘de’l-imhâl ve’l-kabûl dükkân-ı mezkûr ile âlât-ı muharrere-i mezkûreyi dahi ba‘de’t-tahliyye ve’t-tekābuz fâriğân ani’ş-şevâgili’l-uhrâ kemâ-fi’s-sâbık târih-i mezkûrdan beher şehr altmış ikişer buçuk guruşa yine mesfûr Begos zimmîye bi’l-vekâle îcâr ve teslîm eylediğimde ol dahi istîcâr ve tesellüm ve kabz edüp ol vechile meblağ-ı bâkī-i mezkûrdan mâ‘adâ husûs-ı mezkûra ve sâire müte‘allika bi’l-asâle ve bi’l-vekâle külliyen kat‘-ı münâza‘a ve ref‘-i muhâsama eyledik deyü vekîl-i mersûm Perak [Takohi] zimmînin bi’l-cümle takrîr-i meşrûhunu mersûm Begos zimmî tasdîk ve ber-vech-i meşrûh kabûlü hâvî mesfûrânın zimmetlerini ibrâ ve âlât-ı merkūme müvekkile-i mersûmenin mâl-ı müşterâsı olup kendinin kat‘â alâkası olmadığını ve ber-vech-i muharrer hâlâ istîcâr ve ibrâdan müstesnâ meblağ-ı bâkī-i merkūm sekiz yüz on iki buçuk guruş zimmetinde deyni olup müddet-i mehl-i mezkûr tamamında edâya ta‘ahhüd eylediğini tâyi‘an ve kat‘iyyen ikrâr u i‘tirâf eylediği İstanbul Mahkemesi’nden huzûr-ı âlîlerine i‘lâm olundu. Bâkīyü’l-emr li-men lehü’l-emr. Fi’l-yevmi’s-sâdis min-şehri Rebî‘ülâhir li-sene seb‘a ve selâsin ve mi’eteyn ve elf