İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 230 Hüküm no: 206 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keten tohumu yetiştiren çiftçilerle, beziryağcı esnafının fiyat üzerinde anlaştıkları Bezir yağcılarının keten tohumu semeninden yedlerinde olan fiyat üzere Mukābele şüd Ma‘rûz[-ı dâ‘î-i devlet-i aliyyeleridir ki] Civâru’s-saltanâti’s-seniyye -hamâhâllâhu te‘âlâ ani’l-âfât ve’l-beliyye-de olan erbâb-ı zürrâ‘dan Çiftçibaşı Halil Ağa ve Süleyman Ağa ve hâssa hasekilerinden Ahmed Ağa ve Nesim Ağa ve diğer Ahmed Ağa ve İzzet Bey ve Derviş Musa ve Mehmed Ağa ve diğer Halil Ağa ve sâir Müslimîn ile re‘ayâdan () nâm zimmî ve sâirleri İstanbul mahkemesinde meclis-i şer‘-i enverde Âsitâne-i aliyye ve bilâd-ı selâse ve tevâbi‘lerinde kâin beziryağcı esnâfının kethüdâları es-Seyyid Hüseyin Ağa ve Yiğitbaşı Yusuf ve Yazıcı Osman Efendi ve esnâfından Ali Yazıcı ile re‘âyâdan Ananid ve Arib ve Marat ve Zabino ve Lefter ve Todori ve Ağapey ve Dimitri ve Avrail ve Nikola ve Asrail ve diğer Todori nâm zimmîler ve sâirleri muvâcehelerinde civâr-ı Âsitâne-i aliyyede kâin uhdelerimizde olan çiftlikât ve arâzide zirâ‘atimizle hâsıla olan hubûbâtdan keten tohumlarını kadîmden berü ve Âsitâne-i aliyye ve bilâd-ı selâse ve tevâbi‘lerinde olan esnâf-ı mezkûre kethüdâları ma‘rifetiyle fiyatı kat‘ olunarak esnâfa tevzî‘ tarîkiyle bey‘ edüp onlar dahi iştirâ etmek esnâf-ı mezkûrenin nizâmları şürûtundan iken sene-i sâbıkāda zirâ‘atimizle hâsıla olup hâlâ anbarlarımızda ve yedlerimizde mevcûd keten tohumunu esnâf-ı merkūme nizâmları üzere iştirâ etmeyüp yedimizde kalmağla cümlemizin mağdûriyetîmize bâ‘is olur hâlâta tasaddî eylediklerine binâen esnâf-ı merkūmeden Bâb-ı âliye arzuhâl takdîmiyle şikâyet etmiştik el-hâletü hâzihî esnâf-ı merkūme ile beynimiz tevfîk ve ıslâh olunup biz hâlâ yedlerimizde mevcûd keten tohumlarımızı beher keylini yedişer yüz ikişer paraya esnâf-ı mezkûreye bey‘e onlar dahi ber-vech-i meşrûh iştirâ etmek üzere bi’t-terâzî kat‘-ı fiyat eylediğimizde fîmâ ba‘d esnâf-ı merkūme kethüdâsı mezbûr es-Seyyid Hüseyin Ağa nizâm-ı kadîmleri üzere ber-vech-i muharrer fiyatını kat‘ eylediğimiz keten tohumunu esnâf-ı merkūmeye tevzî‘ eylediğinde her bir yağhânenin hisse tevzî‘ine isâbet eden mikdârını mübeyyen yedlerimize pusula verüp biz dahi her birinin hisselerini kethüdâ pusulasıyla kayık ile gidecek yağhânelerine kayık ile ve araba ile [40b] gidecek mahallere araba ile nakl ve teslîm eylediğimizde iktizâ eden semenlerinin nısfını yevm-i teslîmden otuz bir gün tamamında ve nısf-ı âhırını altmış bir gün tamamında tekmîlen bize edâya ta‘ahhüd edüp bu vechile bi’t-terâzî ittifâk ve ittihâd ile kat‘-ı nizâ‘ eyledik deyü mukāveleleri tarafeyn iltimâsıyla tescîl mahkeme-i merkūmeden huzûr [-ı âlîlerine i‘lâm olundu.] Fî 15 R sene 1237