İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 231 Hüküm no: 208 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahar v. Apostol’un tütün dükkanı gediğini Bostancı Seyyid Halil Ağa’ya sattığı Tütüncü gediği mübâya‘ası sûret-i istid‘âsı Ma‘rûz[-ı dâ‘î-i devlet-i aliyyeleridir ki] Tütüncü esnâfından Çekirdekli Bahar v. Apostol nâm zimmî meclis-i şer‘-i münîrde Yedikule bostancılardan Geredeli bâ‘isü’l-i‘lâm es-Seyyid Halil Ağa b. Ali muvâcehesinde esnâf-ı merkūme kethüdâsı vekîli es-Seyyid Mustafa Ağa ve Yiğitbaşı es-Seyyid Abdullah Çelebi ve tüccârdan Mehmed İzzet Ağa ve Mehmed Şâkir Ağa ve es-Seyyid el-Hâc İsmail Ağa ve sâirleri hâzır oldukları hâlde takrîr-i kelâm edüp akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan İstanbul’da duhân gümrüğü civârında Yağcılar Sûku nâm mahalde kâin bir tarafdan es-Seyyid Derviş Ali ve bir tarafdan Halil Usta mahzenleri ile mahdûd ve bir bâb tütüncü dükkânı derûnunda mevcûde ve maden kaleminde mukayyed beyne’l-hiref gedik tâ‘bir olunan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan [bi-safkatin] vâhidetin beş bin guruş semen-i medfû‘ ve makbûza mezbûr Bostanî es-Seyyid Halil Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle ba‘de’l-yevm âlât-ı lâzıme-i ma‘lûmede benim kat‘â alâka ve medhalim kalmayup mezbûr Bostanî es-Seyyid Halil Ağa’nın mülk-i müşterâsı olmuşdur deyü eylediği takrîrini mezbûr Bostanî es-Seyyid Halil Ağa ba‘de’t-tasdîk mezbûr Bostanî es-Seyyid Halil Ağa âlât-ı lâzıme-i mezkûrenin kaleminde mesfûr Çekirdekli Bahar zimmî üzerine olan kayd-ı atîki ref‘ ve terkīn ve kendi ismine kayd ile yedine müceddeden sûret i‘tâsı istid‘âsına olmağın istid‘âsı üzere âlât-ı lâzıme-i mezkûrenin mesfûr Çekirdekli Bahar zimmî üzerinde olan kaydı ref‘ ve terkīn ve müşteri-i mezbûr Bostanî es-Seyyid Halil Ağa ismine kayd ile sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 28 R sene 1237