İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 232 Hüküm no: 209 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cevâhirci David v. Yasef’in, alacak davasında Sarraf Agob v. Arakil ile sulh olduğu 3.800 guruşa sulh ve ibrâ Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde isimleri mastûr Yasef Baroh ve şerîki ve karındaşı Berkad ve İsak Baroh veledey Elyazer v. Yasef nâm Yahûdi bâzergânlar taraflarından husûs-ı âtîde taleb ve da‘vâ ve ahza ve kabza ve lede’l-iktizâ sulh ve ibrâya ve bunlar mütevakkıf olduğu umûrun küllîsine vekîl olduğu Şemanto v. Yasef ve Elyazer v. Yako nâm Yahûdiler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Cevâhirci David v. diğer Yasef nâm Yahûdi bi’t-terâzî du‘âhânemizde ma‘kūd meclis-i şer‘-i enverde mahmiye-i İstanbul’da Mahmud Paşa kurbünde vâki‘ Kaşıkçı hanında mütemekkin sâhib-i arzuhâl Sarraf Agob v. Arakil nâm zimmî muvâcehesinde müvekkillerim mesfûran Yasef Baroh ve İsak Baroh Yahûdilerin yedlerinde olup bundan akdem zâyi‘ olan bir kıt‘a temessük mantûkunca müşterek mâllarından mesfûr Sarraf Agob zimmî zimmetinde cihet-i karz-ı şer‘îden altı bin guruş alacak hakları olup meblağ-ı mezbûrun bin guruşunu mesfûr Sarraf Agob zimmî yedinden ahz ü kabz etmeleriyle bâkīsi olan beş bin guruşunu mesfûr Sarraf Agob zimmîden müvekkillerim mesfûrûn içün bi’l-vekâle taleb ederim deyü inkârına mukārin tasaddî eylediğim da‘vâmdan bâ-vesâtet-i muslihîn mesfûr Sarraf Agob zimmî ile an inkâr müvekkillerim mesfûrâna izâfetle üç bin sekiz yüz guruş üzerine bi’l-vekâle ba‘de akdi’l-musâlaha ve’l-kabûl bedel-i sulh-i merkūm üç bin sekiz yüz guruşun iki bin guruşunu mesfûr Sarraf Agob zimmî nakden bana def‘ ve teslîm ben dahi yedinden bi’l-vekâle ahz ü kabz edüp bâkīsi olan bin sekiz yüz guruşunu işbu târih-i i‘lâmdan kırk bir gün tamamında müvekkillerim mesfûrân içün bana edâya ta‘ahhüd eylediğinde ben dahi râzı olmamla meblağ-ı bâkī-i merkūmdan mâ‘adâ beş bin guruşa varınca ziyâde müdde‘âma ve işbu târih-i i‘lâma gelince mesfûr Sarraf Agob zimmî zimmetinde kat‘a hakları kalmamak manasına âmme-i de‘âvî ve mutâlebât ve kâffe-i eymân ve muhâsamâtdan ibrâ-i âmm-ı kātı‘u’n-nizâ‘ ve râfiü’l-hısâm ile mesfûr Sarraf Agob zimmînin zimmetini müvekkillerim mesfûrâna izâfetle bi’l-vekâle ibrâ ve iskāt eylediğimde ol dahi cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan ibrâ-i âmm-ı kātı‘u’n-nizâ‘ ve râfi‘u’l-hısâm ile müvekkillerim mesfûrânın zimmetlerini kezâlik ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl edüp ve müvekkillerim mesfûrânın mersûm Sarraf Agob zimmînin şerîki gāib ani’l-meclis Mikail v. Avanes zimmî zimmetinde dahi kat‘â hakları olmayup ve zâyi‘ olan temessük-ı mezkûr zuhûr ederse amel ve i‘tibâr olunmaya deyü vekîl-i mesfûr Cevâhirci David Yahûdi’nin eylediği takrîrini mesfûr Sarraf Agob zimmî tasdîk [41a] ve bedel-i sulh-i merkūmdan bâkī meblağ-ı mezbûr bin sekiz yüz guruş ber-vech-i muharrer zimmetinde deyni olduğunu tâyi‘an ikrâr ve müddet-i mezkûre tamamında edâya ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 26 R sene 1237 Şuhûdü’l-hal: Kâğıtçılar Kethüdâsı es-Seyyid Mehmed Efendi, Kâğıdcı el-Hâc Mehmed Ağa, Kâğıtçı el-Hâc Mesud Ağa, Kaşıkçı el-Hâc Salih Ağa, Cemâlîzâde es-Seyyid el-Hâc Mustafa Ağa, Kağıtçıbaşı el-Hâc Mehmed Emin Ağa, Cemâlîzâde Hâmiş Ağa