İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 246 Hüküm no: 222 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alâüddevle Bey ve Şahruh Bey Câmi-i kebîri vakfının tevliyetinin Çerkes Mehmed Bey’e tevcihi Vakfiye Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen işbu arzuhâl ve derkenâra nazar ve mütâla‘a olundukta Sivas ve Maraş ve gayrıda vâki‘ merhûm Alâüddevle Bey ve Şahruh Bey Câmi‘-i kebîri Vakfı’nın vazîfe-i mu‘ayyene ile nısf-ı tevliyetine ve Süleymanlu-yı sagīr kazâsına tâbi‘ Sarıcalu’da vâki‘ merhûm Şahruh Bey b. Alâüddevle Bey Zaviyesi Vakfı’nın dahi yevmî nîm akçe vazîfe ile nısf-ı tevliyetine ber-vech-i meşrûta bâ-berât-ı âlîşân mutasarrıf olan Halil Bey b. İbrahim Bey fevt olup nısf-ı tevliyet-i mezkûreler mahlûl olmağla tevliyet-i merkūmelerin nısfları müteveffâ-i mezbûrun mahlûlünden şart-ı vâkıf ve amel-i kadîm üzere kendüye tevcîh olunmak bâbında tevliyet-i mezkûrelerin vazîfe-i mersûmeleriyle nısf-ı âharlarına bâ-berât-ı âlîşân ber-vech-i meşrûta mutasarrıf olan sâhib-i arzuhâl Çerkes Mehmed Bey b. Hasan istid‘â-yı inâyet eylediği meâl-i arzuhâlden ve zikr olunan Alâüddevle Bey ve Şahruh Bey Câmi‘-i kebîri Vakfı’nın vazîfe-i mu‘ayyene ile nısf-ı tevliyeti ve Süleymanlu-yı Sagīr kazâsına tâbi‘ Sarıcalu’da vâki‘ merhûm Şahruh Bey b. Alâüddevle Bey Zâviyesi Vakfı’nın dahi yevmî nîm akçe vazîfe ile nısf-ı tevliyeti aslah-ı evlâd-ı vâkıfdan şart-ı vâkıf ve amel-i kadîm üzere sâhib-i arzuhâl Çerkes Mehmed Bey’in ve nısf-ı âharları vazîfe-i mersûmeleriyle şerîki aslah-ı evlâd-ı vâkıfdan derecede ve aslahiyetde müsâvî olan müteveffâ-i mezbûr Halil Bey’in bâ-berât-ı âlîşân müştereken ve vakfeyn-i mezkûreynin yed-i vâhidden idâresi içün kāimmakāmlığı müstakillen müteveffâ-i mezbûrun üzerinde mastûr ve mukayyed idüğü derkenârdan müstebân oldukdan sonra mezbûr Çerkes Mehmed Bey İstanbul Mahkemesinde meclis-i şer‘-i münîrde zikr olunan tevliyetlerin nısflarına benimle derecede ve aslahiyetde müsâvî olan merkūm Halil Bey fevt olup nısf hissesi mahlûl olmağla ben batn-ı evvel-i evlâd-ı vâkıfdan ve aslah ve umûr-ı vakfı a‘lem ve el-yevm batn-ı evvelde münferid olduğumdan müstakillen nevbet-i tasarruf benim olmağla tevliyet-i mezkûrelerin nısfları dahi vazîfe-i mersûmeleriyle şart-ı vâkıf ve amel-i kadîm üzere bâ-berât-ı âlîşân ber-vech-i meşrûta mutasarrıf olduğum nısf-ı âharlarına ilhâk bana tevcîh ve kāimmakāmlık-ı merkūmun berâtı kaydı terkīn buyrulmak matlûbumdur deyü istid‘â-yı inâyet etmeğin fi’l-hakīka merhûm Çerkes Mehmed Bey’in bi’l-cümle takrîr ve istid‘âsı vâkı‘a mutâbık idüğü Mehmed Efendi b. Hüseyin ve Hasan Ağa b. Mustafa ve Ahmed Ağa b. Hasan ve Ebûbekir Ağa b. Mehmed ve Ali Ağa b. Süleyman ve sâir mazbûtü’l-esâmî mevsûku’l-kelîm Müslimînin bi’l-muvâcehe alâ-tarîkı’ş-şehâde haber vermeleriyle zâhir ve mütehakkık olmağın bu takdîrce sâlifü’z-zikr Sivas ve Maraş ve gayrıda vâki‘ merhûm Alâüddevle Bey ve Şahruh Bey cami‘-i kebîri vakfının vazîfe-i mu‘ayyene ile nısf tevliyeti ve Süleymanlu-yı sagīr kazasına tâbi‘ Sarıcalu’da vâki‘ merhûm Şahruh bey b. Alâüddevle Bey Vakfı’nın dahi yevmî nîm akçe vazîfe ile nısf-ı tevliyeti müteveffâ-i mezbûr Halil Bey’in mahlûlünden tevliyeteyn-i mezkûreteyn vazîfe-i mersûmeleriyle nısf-ı âharlarına bâ-berât-ı âlîşân ber-vech-i meşrûta mutasarrıf olan şerîki aslah-ı evlâd-ı vâkıfdan ve batn-ı evvelde münferid olduğu mütehakkık olan merkūm Çerkes Mehmed Bey dâ‘îlerine şart-ı vâkıf ve amel-i kadîm üzere ilhâkan tevcîh ve yedine berât-ı şerîf-i âlîşân sadaka ve ihsân buyrulmak iktizâ eylediği imtisâlen li’l-emri’l-âlî mahkeme-i merkūmeden huzûr [-ı âlîlerine i‘lâm olundu.] Fî 4 Ca sene 1237