İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 260 Hüküm no: 236 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Yurdam v. Yani’nin vârislerinin, taşçı dükkânı gediği hususunda Taşçı İlya v. Mihal ile sulh oldukları Taşçı gediği mu‘ârazadan men‘ Mukābele şüd Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mastûrü’l-ism olup bundan akdem hâlik olan Taşçı Yurdam v. Yani zimmînin verâseti zevcesi Kelane bt. Atam Nasrâniye ile sulbî kebîr oğulları Petrak ve Yuvan zimmîlere münhasıra ba‘dehû mesfûre Kelane Nasrâniye dahi hâlike olup verâseti oğulları mesfûran Petrak ve Yuvan zimmîlere münhasıra ba‘dehâ mesfûr Yuvan zimmî dahi hâlik olmağla verâseti zevcesi Despino bt. Nikola Nasrâniye ile sulbî kebîr oğlu Nikola ve sulbiye kebîre kızı Ezmarağda Nasrâniyeye münhasıra ve tashîh-i mesele-i mîrâsları bi-hükmi’l-münâsahati’ş-şer‘iyye kırk sekiz sehmden olup sihâm-ı mezbûrenin yirmi dört sehmi mersûm Petrak zimmîye ve üç sehmi zevce-i mesfûre Despino Nasrâniyeye ve on dört sehmi mersûm Nikola zimmîye ve yirmi sehmi mersûme Ezmarağda Nasrâniye’ye isâbeti tahakkukundan sonra sâhibey-i arzuhâlden mesfûr Nikola zimmî ve mu‘arrefetü’ş-şahs anası mersûme Despino Nasrâniye meclis-i şer‘-i enverde zikri âtî gedik âlâtının nısf-ı şâyi‘ine vaz‘-ı yedi mütehakkık olan derûn-ı arzuhâlde mastûrü’l-ism Taşçı İlya v. Mihal nâm zimmî muvâcehesinde mahmiye-i İstanbul’da Kumkapı’da vâki‘ ma‘lûmü’l-hudûd bir bâb taşçı dükkânı derûnunda mevcûde beyne’l-hiref gedik tâ‘bir olunur âlât-ı lâzıme-i ma‘lûme hâmiş-i arzuhâlimizde derkenâr olunan sûret mûcebince mûrisimiz hâlik-i evvel-i mersûmun ile’l-helâk yedinde mâlı ve mülkü olup ba‘de helâkihi ber-tashîh-i merkūm münâsahaten bizimle verese-i sâiresine mevrûs olmuşken mesfûr İlya zimmî âlât-ı lâzıme-i mezkûreyi bi-gayr-ı hakkın fuzûlî zabt etmekle âlât-ı muharrere-i mezkûreden ber-tashîh-i merkūm cem‘an hissemize isâbet eden on yedi sehm hissemizi mersûm İlya zimmîden taleb ederiz deyü da‘vâ eylediğimizde ol dahi cevâbında âlât-ı muharrere-i mezkûre hâlik-i evvel-i mersûmun sağlığında yedinde mâlı olduğunu ikrâr lâkin hâlik-i sâlis-i mersûm Yuvan zimmî babası mersûmdan ve anası hâlike-i sâniye-i mesfûreden mevrûs nısf hissesini bin iki yüz on dokuz senesi Recebinin on dokuzuncu günü târihiyle müverraha ve ol târihde vilâyet-i Anadolu’da Turgudlu kazâsı nâibi olan el-Hâc Mehmed Efendi’nin imzâ ve hatmini hâviye yedimde olan bir kıt‘a hüccet-i şer‘iyye mantûkunca sağlığında tarafeynden bi’l-îcâb ve’l-kabûl bâtten ve sahîhan beş yüz guruş semen-i makbûza Anderya v. Marat nâm zimmîye bey‘ ve Âsitâne-i aliyyede kabz etmek üzere teslît eylediğinde ol dahi ba‘de’l-iştirâ Âsitâne-i aliyyeye gelüp kabz ettikden sonra mesfûr Anderya zimmî dahi bin iki yüz yirmi sekiz senesi Şevvâli’l-mükerreminin on beşinci günü târihiyle muvarraha ve ol târihde İstanbul’da Ahî Çelebi mahkemesi nâibi olan es-Seyyid Mehmed Râşid Efendi’nin imzâ ve hatmini hâviye yedimde olan diğer hüccet-i şer‘iyye mûcebince kezâlik bâtten ve sahîhan tarafeynden bi’l-îcâb ve’l-kabûl yedi yüz elli guruş semen-i makbûza bana bey‘ ve teslîm ben dahi iştirâ ve kabz eylediğimde hâlik-i sâlis-i mersûm Yuvan zimmî Âsitâne’de bana mülâki olup benim bey‘ eylediğim nısf gediği sen iştirâ etmişsin haz etdüm mübârek olsun deyü tebrîk dahi edüp ol vechile âlât-ı muharrere-i mezkûrenin nısf-ı şâyi‘i mülk-i müşterâm olmak üzere bi-hakkın zabt ederim deyü inkârımıza mukārin eylediği def‘i isbât edememekle bizi tahlîf sûretde iken bâ-vesâtet-i muslihîn da‘vâ-yı mezkûremizden mesfûr İlya yüz elli guruş bedel-i makbûz ve müstehlek üzerine ba‘de akdi’l-musâlaha ve’l-kabûl husûs-ı mezkûra ve bedel-i müstehlek-i merkūmun istirdâdına müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt edüp fîmâ ba‘d zikr olunan taşçı dükkânı gediğine müte‘allika mesfûr İlya zimmî ile kat‘â da‘vâ ve nizâ‘ ve husûmetimiz kalmadı deyü ikrâr ve tasdîkleri İstanbul Mahkemesi’nden huzûr [-ı âlîlerine i‘lâm olundu.] Fî 24 Ca sene 1237