İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 259 Hüküm no: 235 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevkii Cafer Çelebi Mescidi vakfının kiradaki hamam ve dükkânları ile ilgili davanın Simav kasabasında görülmesi gerektiği Vakfiye Simav kasabasında Mukābele şüd Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen meâl-i istid‘â ve kuyûda nazar olundukta mahmiye-i İstanbul’da Sultan Selim kurbünde vâki‘ Tevki‘î Cafer Çelebi Mescidi Vakfı müstegallâtından vilâyet-i Anadolu’da Simav kazâsı pazarında kâin dekâkîn-i müte‘addide ve hamamın bâ-temessük-ı mütevellî bi’l-icâreteyn mutasarrıfları olan kimesneler senevî icâre-i müeccelelerini cânib-i vakfa edâ edüp lâkin dekâkîn-i mezkûre ve hamamın bi’l-icâreteyn mutasarrıflarından bilâ-veled fevt olanların tasarruflarında olan müsakkafât cânib-i vakfa âid ve mahlûl oldukda taraf-ı vakıfdan mu‘accele-i misliye ve müeccele-i kadîmesiyle âhara îcâr olunmak iktizâ eder iken sâir emlâk misillü verese-i sâireleri zabt-ı da‘vâsıyla âhara icâra mümâna‘at-birle vakf-ı merkūma gadr sevdâsında olmalarıyla sıyâneten li’l-vakf müsakkafât-ı mezkûre mutasarrıflardan bilâ-veled fevt olanların mahlûlleri vukū‘unda mülk misillü sâir verese müdâhale [46b] etmeyüp taraf-ı vakıfdan mu‘accele ve müeccele ile icâra mümâna‘at edenlerin men‘i bâbında kazâ-i mezbûr hâkimine hitâben bâ-fermân-ı âlîşân sudûrunu vakf-ı merkūm mütevellîsi sâhib-i arzuhâl es-Seyyid Abbas b. Salih’in istid‘â eylediği meâl-i arzuhâlinden ve vakf-ı merkūmun mütevellîsi bâ-öşr-i mahsûl mezbûr es-Seyyid Abbas’ın bâ-berât-ı âlîşân üzerinde ve zîrde pazar ma‘a dekâkîn der-kazâ-i Simav pazarı ve hamam der-kurb-ı kazâ-i Simav pazarı hâsılâtı vakf-ı merkūm müstegallâtından olup ber-mûceb-i defter-i hakani vakf-ı mezbûr tarafından zabtı içün iki yüz otuz üç senesi hılâlinde defter emini arzıyla emr-i âlî sâdır olmuş idüğü derkenârlar mefhûmlarından müstebân olup bu takrîrce zikr olunan dekâkîn ve hamam mahallinde kadîmden vakf-ı merkūmun icâreteyn ile îcâr olunur müstegallâtından olup ol vechile bilâ-veled fevt olanların mahlûllerini verese-i sâireleri mülk misillü zabt eyledikleri mahallinde vâzı‘u’l-yed olanlar muvâcehelerinde vech-i şer‘î üzere lede’l-murâfa‘a zâhir ve mütehakkık olduğu sûretde işbu arzuhâle merbût olan fetvâ-yı şerîfe mûcebince mülk misillü dekâkîn-i mezkûreye ve hamam-ı mezkûra ve mütevellî-i merkūmun taraf-ı vakıfdan bi’l-icâreteyn icârına müdâhale ve mümâna‘at edenler mahallinde ma‘rifet-i şer‘le men‘ ve def‘ olunmak bâbında kazâ-i merkūm hâkimine hitâben fermân-ı âlîşân sudûru muvâfık-ı şer‘-i şerîf ve muktezâ-yı maslahat idüğü imtisâlen li’l-emri’l-âlî İstanbul Mahkemesi’nden huzûr-ı âlîlerine i‘lâm olundu. Fî 23 Ca sene 1237