İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 263 Hüküm no: 240 Orijinal metin no: [47a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Apostol’un ipekçi gediğini İsbir v. Yorgi’ye sattığı Kazzâz gediği 3.000 guruşa Mukābele şüd Ma‘rûz[-ı dâ‘î-i devlet-i aliyyeleridir ki] Kazzâz esnâfından Yorgi v. Apostol nâm zimmî meclis-i şer‘-i münîrde kazzâzlar kethüdâsı Abdüllatif Ağa ve Yiğitbaşıları Mehmed ve sâir ma‘lûmü’l-esâmî ustaları hâzır oldukları hâlde bâ‘isü’l-i‘lâm İsbir v. Yorgi nâm zimmî muvâcehesinde takrîr-i kelâm edüp İstanbul’da bezzâzistân-ı atîk civârında Çakır Ağa sûkunda kâin ma‘lûmü’l-hudûd bir kepenkli bir bâb kazzâz dükkânı derûnunda mevcûde bir gedik i‘tibâriyle başmuhâsebe kaleminde mukayyed beyne’l-hiref gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin mersûm İsbir zimmîye üç bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i mezkûre mersûm İsbir zimmînin mülk-i müşterâsı olup benim kat‘â alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i mezkûrenin kaleminde mesfûr Yorgi zimmî üzerine olan kayd-ı atîki ref‘ ve terkīn-birle mesfûr İsbir zimmî ismine kayd ve yedine nizâmları şürûtu üzere bir kıt‘a sûret i‘tâsı bâbında istid‘â-yı inâyet etmeğin istid‘âsı üzere gedik-i mezkûrun mesfûr Yorgi zimmî üzerine olan kaydı ref‘ ve müşteri-i mersûm İsbir zimmî üzerine kayd ile sûret i‘tâ buyrulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 6 C sene 1237