İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 264 Hüküm no: 241 Orijinal metin no: [47a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Yani v. Yaşto ile ortağı Hüseyin Ağa b. Hasan’ın zeytinyağı semeninde sulh oldukları Revgan-ı zeyt semeninden 4.099 guruş hüküm tarafeynin yedlerinde olan tulum ve yedeği dahi taksîm Ma‘rûz[-ı dâ‘î-i devlet-i aliyyeleridir ki] Revgan-ı zeyt tüccârından sâhib-i arzuhâl Movlovalı Küçük Yani v. Yaşto nâm zimmî meclis-i şer‘-i hatîrde şerîki derûn-ı arzuhâlde mastûrü’l-ism Yağcıbaşı Movlovalı el-Hâc Hüseyin Ağa b. Hasan nâm kimesne muvâcehesinde ben bin iki yüz otuz altı senesi Muharremi’l-harâmı gurresinde mâlımdan on beş bin guruş ve mezbûr el-Hâc Hüseyin Ağa dahi mâlından yedi bin beş yüz guruş ifrâz ve birbirine halt ile fâide-i hâsılanın sülüsânı benim ve sülüsü mezbûr el-Hâc Hüseyin Ağa’nın olmak üzere revgan-ı zeyt ve sabun ve üzüm ve çam kabuğu bey‘ u şirâsına akd-i şirket-birle işbu târihe gelince şerîkler olup bu def‘a fesh-i akd-i şirket-birle hesâbımızı mahallinde tüccâr huzûrunda ma‘rifet-i şer‘le yegān yegān sahîhan rü’yet eylediğimizde ruûs-ı mâl-ı mezkûra sekiz bin yedi yüz yirmi sekiz guruş on sekiz para zarâr terettüb etmekle meblağ-ı mezkûrdan benim re’s-i mâl-i mezkûruma göre sülüsân hisseme beş bin sekiz yüz on sekiz guruş otuz dokuz para ve mezbûr el-Hâc Hüseyin Ağa’nın kezâlik re’s-i mâlına göre sülüs hissesine iki bin dokuz yüz dokuz guruş on dokuz para isâbet edüp lâkin lede’l-muhâsebe benim şerîkim mezbûr el-Hâc Hüseyin Ağa zimmetinde re’s-i mâl-i mezkûrumdan dört bin dokuz yüz dokuz guruş sahîhan alacağım zuhûr [47b] etmekle meblağ-ı mezkûr dört bin dokuz yüz dokuz guruşu bana edâya ve tarafeyn yedlerinde mâl-ı şirketden ma‘lûmü’l-aded tulum ve yedek mevcûd olmağla âhara füruht olundukta yine beynimizde islâsen iktisâm olunmak üzere mezbûr el-Hâc Hüseyin Ağa ta‘ahhüd etmekle meblağ-ı mezbûr dört bin dokuz yüz dokuz guruş ve zikr olunan tulum ve yedekden mâ‘adâ ancak husûs-ı şirkete ve hesâbda galat vukū‘una müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik dediğini mezbûr el-Hâc Hüseyin Ağa tasdîk ve ber-vech-i meşrûh kabûlü hâvî ibrâ eylediğini ibrâdan müstesnâ olunan meblağ-ı mezkûr dört bin dokuz yüz dokuz guruş zimmetinde sahîhan el-yevm deyni olduğunu tâyi‘an ve kat‘iyyen ikrâr u i‘tirâf ve meblağ-ı mezkûr dört bin dokuz yüz dokuz guruşu çend rûz zarfında müdde‘î-i mesfûra edâya ve tarafeyn yedlerinde olan tulum ve yedeği dahi ba‘de’l-bey‘ beynlerinde islâsen taksîm etmek üzere müte‘ahhid olduğu İstanbul Mahkemesi’nden huzûr [-ı âlîlerine i‘lâm olundu.] Fî-gurre-i C sene 1237