İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 268 Hüküm no: 245 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan Hilmi Efendi’nin, Derviş oğlu Andon v. Agob’a olan borcunu ödemesi gerektiği 10.000 guruş hüküm Ma‘rûz[-ı dâ‘î-i devlet-i aliyyeleridir ki] Sarraf tâifesinden sâhib-i arzuhâl Sofçu Derviş oğlu Andon v. Agob nâm zimmî meclis-i şer‘-i münîrde derûn-ı arzuhâlde mastûrü’l-ism kuzâtdan es-Seyyid Hasan Hilmi Efendi b. Hüseyin muvâcehesinde bin iki yüz otuz beş senesi Saferi’l-hayrının yirmi altıncı günü târihiyle müverraha işbu yedimde olan bir kıt‘a hüccet-i şer‘iyye nâtık olduğu üzere mûmâ-ileyh es-Seyyid Hasan Hilmi Efendi zimmetinde târih-i merkūmda olan ibrâmızdan müstesnâ bedel-i sulh-i sahîh-i şer‘iyyeden ve cihet-i karzdan alacak hakkım olan on dört bin guruş ve ba‘dehû sene-i mezbûre şehr-i Rebî‘ülevveli gurresi târihiyle müverrah bir kıt‘a tahvîl mûcebince yine cihet-i karzdan elli guruş sene-i mezbûre şehr-i Rebî‘ülâhir gurresinden on bir ay tamamına değin vilâyet-i Rumeli’nde Meristro kazâsında nâibü’ş-şer‘i’ş-şerîf olmağla yedime i‘tâ eylediği bir kıt‘a emir tahvîli mûcebince beher şehr bin ellişer guruşdan müddet-i mezbûreden bi-şartü’r-rücû‘ kapıkethüdâsı olan Seydâ Efendi’ye mâlımdan medfû‘um olan on bir bin beş yüz elli guruş ve harc-ı bâb ve ibkā nâmıyla kezâlik mâlımdan medfû‘um olan yedi yüz elli guruş ki min-haysü’l-mecmû‘ yirmi altı bin üç yüz elli guruşun on dört bin guruşunu ceste ceste ahz ü kabz ve istîfâ edüp bâkīsi olan on iki bin üç yüz elli guruş hâlâ mûmâ-ileyh zimmetinde alacak hakkım olmağla taleb ederim [deyü] da‘vâ eylediğimde ol dahi cevâbında meblağ-ı mecmû‘-ı mezkûrdan ancak hâric-i bâb [harc-ı bâb] ve ibkā nâmıyla medfû‘um olan [48b] yedi yüz elli guruşa emrini inkâr ve mâ‘adâ müdde‘âmı tamamen ikrâr edüp lâkin kabzını mu‘terif olduğun meblağ-ı mezbûr on dört bin guruşdan gayrı iki bin iki yüz otuz guruş dahi sana edâ ve teslîm edüp hatta meblağ-ı mezbûru dahi kabzını ikrâr etmişdin deyü inkârıma mukārin def‘a tasaddî ile beynimizde ba‘de vukū‘ı’l-münâza‘a bâ-vesâtet-i muslihîn ber-vech-i muharrer müdde‘âm olan meblağ-ı merkūm on iki bin üç yüz elli guruşun iki bin üç yüz elli guruşunu rızâmla sulhen hat ve tenzîl eylediğimde mûmâ-ileyh Hasan Hilmi Efendi dahi ba‘de’l-kabûl meblağ-ı mezbûr iki bin iki yüz otuz guruş edâ ve teslîm da‘vâsıyla rızâsıyla meccânen fâriğ olup ol vechile meblağ-ı merkūm on iki bin üç yüz elli guruşdan bâkī kalan on bin guruş hâlâ sahîhan zimmetinde bana deyni olduğunu tâyi‘an ve kat‘iyyen ikrâr u i‘tirâf ettikden sonra meblağ-ı bâkī-i merkūm on bin guruşdan mâ‘adâ işbu târih-i i‘lâma gelince beynimizde cereyân eden bi’l-cümle ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsemâtdan şürût-ı müfside ve muvâza‘adan ârî ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile her birimiz âharın zimmetini kabûlü hâvî ibrâ ve iskāt ve fîmâ ba‘d tarafeynin yedimizde mukaddem târih ile temessük ve tahvîl ve mektûb ve defter ve evrâk-ı sâire zuhûr eder ise kat‘â amel ve i‘tibâr olunmamak üzere külliyen kat‘-ı nizâ‘ etmemizle ibrâdan müstesnâ meblağ-ı bâkī-i merkūm on bin guruşu mûmâ-ileyh es-Seyyid Hasan Hilmi Efendi’den hâlâ taleb ederim deyü eylediği takrîr ve da‘vâsını mûmâ-ileyh es-Seyyid Hasan Hilmi Efendi tâyi‘an ve kat‘iyyen tasdîk ve ikrâr etmeğin alâ-mûcebi ikrârihi ibrâdan müstesnâ meblağ-ı bâkī-i merkūm on bin guruşun bi’t-taleb müdde‘î-i mesfûr Derviş oğlu Andon zimmîye edâsıyla mûmâ-ileyh es-Seyyid Hasan Hilmi Efendi ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 14 Ca sene 1237