İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 270 Hüküm no: 246 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İsmail Ağa b. Ahmed’in, Fâtıma Hanım bt. Ahmed’e olan borcunu ödemesi gerektiği Mushaf-ı şerîf rehniyetden fek 3.000 guruş mukābilinde Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl zâtı mu‘arrefe Fâtıma Hanım bt. Ahmed meclis-i şer‘-i enverde Mısırçarşısı attârlarından derûn-ı arzuhâlde mezkûrü’l-ism es-Seyyid İsmail Ağa b. es-Seyyid Ahmed nâm kimesne muvâcehesinde mezbûr es-Seyyid İsmail Ağa zimmetinde işbu yedinde olan bin iki yüz otuz altı senesi şehri Rebî‘ülâhirinin yirmi birinci günü târihiyle müverrah bir kıt‘a temessük mantûkunca cihet-i karz-ı şer‘îden üç bin guruş ve semeni târih-i merkūmdan bir sene müeccelen mâlımdan bey‘ ve teslîm eylediğim bir kıt‘a Mushaf-ı şerîf hediyesinden üç yüz doksan altı guruş ki ciheteyn-i merkūmeteynden cem‘an üç bin üç yüz doksan altı guruş alacak hakkım olup meblağ-ı mecmû‘-ı merkūm mukābelesinde İstanbul’da Mısırçarşısı dâhilinde tahmîs tarafında kitapçılar köşesinden beşinci bir bâb attâr dükkânı derûnunda mevcûde beyne’l-esnâf gedik tâ‘bir olunur yedinde mâlı olan âlât-ı lâzıme-i ma‘lûmesini rehin vaz‘ ve bana teslîm ben dahi ba‘de’l-irtihân ve’l-kabz ecel-i merkūm hulûlünde meblağ-ı mecmû‘-ı merkūmdan Mushaf-ı şerîf hediyesi olan üç yüz doksan altı guruşu yedinden ahz ü kabz ve istîfâ edüp bâkī-i cihet-i karzdan hakkım olan meblağ-ı merkūm üç bin guruşu hâlâ edâ etmemekle fekk-i rehin ile meblağ-ı mezbûr üç bin guruşu dahi mezbûr es-Seyyid İsmail Ağa’dan taleb ederim deyü eylediği da‘vâsını merkūm İsmail Ağa bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûcebi ikrârihi fekk-i rehin ile meblağ-ı merkūm üç bin guruşun müdde‘î-i mezbûre Fâtıma Hanım’a edâsıyla mezbûr es-Seyyid İsmail Ağa ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 13 C sene 1237