İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 271 Hüküm no: 248 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serhat v. Avanes’in, Karabet v. Serkiz’e olan borcunu kefili İstefan v. Ohannes’in ödemesi gerektiği Tonbakü semeninden 7.897 guruş hükm-i kefâlete Mukābele şüd Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan arzuhâlde mastûrü’l-ism olup hâlâ Erzurum’da mütemekkin Tonbakücu Serhat v. Avanes v. Atam nâm zimmî tarafından husûs-ı âtîde taleb ve da‘vâ ve ahz ü kabza ve mütevakkıf olduğu umûrun küllîsine vekîl olduğu Kürkçü Ahican v. Manil ve Kürkçü Avakim v. Avanes nâm zimmîler şehâdetleriyle ber-nehc-i şer‘î sâbit olan Kürkçü Karabet v. Serkiz nâm zimmî derûn-ı arzuhâlde mezkûrü’l-ism hâssa hasekilerinden Mehmed Ağa b. Abdullah hâzır olduğu hâlde Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i münîrde sâhibey-i arzuhâlden Tonbakocu İstefan v. Ohannes zimmî muvâcehesinde şerîki Tonbakocu Aram v. Asador nâm zimmî kezâlik hâzır olduğu hâlde bin iki yüz otuz üç senesi Ramazani’l-mübâreğinin on yedinci günü târihiyle müverrah mesfûr İstefan ve şerîki hâzır-ı mesfûr Aram zimmîlerin imzâ ve mühürlerini hâvî Ermeniyyü’l-imlâ işbu yedimde olan bir kıt‘a temessük mantûkunca müvekkilim mesfûr Serhat zimmînin mesfûr İstefan ve şerîki hâzır-ı mersûm Aram zimmî [49a] zimmetlerinde her biri âharın zimmetine lâzım gelen meblağa kefîl ve dâmin olarak semeni târih-i mezkûrdan on ay müeccelen mâlından bey‘ ve teslîm eylediği ma‘lûmü’l-vezn tonbako semeninden sekiz bin üç yüz seksen bir guruş alacak hakkı olup zahr-ı temessükde tahrîr olunduğu üzere meblağ-ı merkūmun dört yüz seksen dört guruşunu mesfûrân yedlerinden müvekkil-i mersûm ahz ü kabz ve istîfâ etmekle bâkīsi olan yedi bin sekiz yüz doksan yedi guruşunu asâlet ve kefâlet-i mahkiyesine binâen ancak mersûm İstefan zimmîden bi’l-vekâle taleb ederim deyü ba‘de’d-da‘vâ ve’l-istintak mersûm İstefan zimmî cevâbında müvekkil-i mersûma temessük-ı merkūm nâtık olduğu üzere semen-i mebî‘-i mezkûrdan hâzır-ı mesfûr ile her biri âharın zimmetine lâzım gelen meblağa kefîl bi’l-mâl olarak meblağ-ı bâkī-i merkūm zimmetlerinde deynleri olduğunu ikrâr lâkin müvekkil-i mersûm Serhat zimmîye deyn-i mezkûrumuzu bin iki yüz otuz altı senesi şehr-i Ramazani’l-mübârekinin on beşinci gününe gelince ceste ceste tamamen edâ ve teslîm edüp zimmetimizde meblağ-ı mezbûrdan bir akçe hakkı kalmadığını müvekkil-i mesfûr Serhat zimmî ikrâr etmişdi deyü tasaddî eylediği defini vekîl-i müdde‘î-i mersûm külliyen inkârından gayrı müvekkilim mersûm Serhat zimmî işbu bin iki yüz otuz yedi senesi şehr-i Rebî‘ülevvelinin beşinci günü târihiyle müverrah medîne-i Erzurum’dan bana irsâl eylediği mektûbda mesfûran İstefan ve Avram zimmîler zimmetlerinde bâkī alacağım olan meblağ-ı merkūm yedi bin sekiz yüz doksan yedi guruşu bi’l-vekâle ahz eyledin ise hâzır-ı mezbûr Haseki Mehmed Ali Ağa’ya ver eğer ahz etmedin ise hâzır-ı merkūmu bi’l-vekâle üzerlerine havâle eyle deyü tahrîr etmekle ben dahi hâzır-ı mezbûr Haseki Mehmed Ali Ağa ile ma‘an yine işbu sene-i mezbûre Rebî‘ülâhirinin on üçüncü günü İstanbul’da Sünbüllühan’da Erzurumlu Yoseb zimmînin odasında ancak mersûm İstefan zimmîden meblağ-ı bâkī-i merkūmu asâlet ve kefâletine binâen bi’l-vekâle taleb eylediğimde ol dahi yevm-i mezkûrdan asâleten ve kefâleten zimmetimde deyni olduğunu ikrâr ve istimhâl etmişdi deyü muahhar târih ile ikrâr ve istimhâl da‘vâsıyla eylediği def‘-i indifâ‘ını? mesfûr İstefan zimmî ba‘de’l-inkâr bu sûretle mesfûr İstefan zimmînin mukaddem târihiyle ile edâ da‘vâsı şer‘an mesmû‘a olmamağla vekîl-i mesfûr Karabet zimmî târih-i muahhar ile eylediği ikrâr ve istimhâl da‘vâsını lede’t-tezkiye makbûlü’ş-şehâde idükleri ihbâr olunan Dellâl Kiragos v. Bedros ve Dülger kalfası Toros v. Kaspar nâm zimmîler şehâdetleriyle bi’l-muvâcehe ber-nehc-i şer‘î ba‘de’l-isbât mesfûr İstefan zimmî târih-i mukaddemde edâ da‘vâsıyla vekîl-i mersûme bî-vech-i şer‘î mu‘ârazadan ba‘de’l-men‘ mûcebince meblağ-ı bâkī-i merkūm yedi bin sekiz yüz doksan yedi guruşu asâlet ve kefâlet-i mahkiyesine binâen müvekkil-i mersûm Serhat zimmî içün vekîl-i müdde‘î-i mesfûr Karabet zimmîye edâ ve teslîme ancak mersûm İstefan zimmîye tenbîh olunduğu İstanbul Mahkemesi’nden huzûr [-ı âlîlerine i‘lâm olundu.] Fî 13 C sene 1237