İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 270 Hüküm no: 247 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Pavli’nin, sözleşme gereği Ayşe Hatun bt. Mehmed’in binasının eksik kalan kısımlarını tamamlayacağını taahhüt ettiği Keşifle nâkıs ebnâyı tekmîline ta‘ahhüd Mukābele şüd Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl zâtı mu‘arrefe Âişe Hatun bt. Mehmed meclis-i şer‘-i münîrde derûn-ı arzuhâlde mastûrü’l-ism neccar tâifesinin Karaman kolu neferâtından Yorgi v. Pavli nâm zimmî muvâcehesinde ben bundan akdem İstanbul’da Sultan Ahmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Atmeydanı karşısında türbe kapısı ittisâlinde vâki‘ bâ-temessük-ı mütevellî bi’l-icâreteyn mutasarrıf olduğum bir bâb muhterik arsa beher zirâ‘ı otuz beş guruşa olarak yüz elli zirâ‘ ebniyeli bir bâb menzil binâ ve inşâ etmek üzere bi-şartü’r-rücû‘ emr ve zimmî-i mersûmla mukāvele ve mâlımdan ceste ceste mesfûr Yorgi zimmîye sekiz bin yedi yüz elli guruş def‘ ve teslîm ol dahi yedimden ahz ü kabz ve menzil-i merkūmu inşâ edüp nâ-tamam olduğu hâlde terk etmekle işbu yedimde olan bir kıt‘a müfredât keşif defteri mantûkunca bi’l-cümle menzil-i merkūma olan masrûfu yedi bin yedi yüz otuz iki buçuk guruşa bâliğ olup ol vechile masrûfu olan meblağ-ı mezkûr yedi bin yedi yüz otuz iki buçuk guruş yedinden makbûzu olan meblağ-ı merkūm sekiz bin yedi yüz elli guruşdan ba‘de’t-tenzîl bâkīsi olan bin on yedi buçuk guruşu bana red ve teslîm yâhud menzil-i merkūmun nâkıs olan mahallerini itmâma mesfûr Yorgi zimmîye tenbîh olunmak murâdımdır deyü da‘vâ ve beynimizde münaza‘ât-ı kesîre cereyân etmişdi el-hâletü hâzihî muslihûn tavassutuyla beynimiz ıslâh ve tanzîm olunup mesfûr Yorgi zimmî ziyâde makbûzu olan meblağ-ı merkūm bin on yedi buçuk guruş ile menzil-i mezkûrun nâkıs olan mahallerini itmâm ve ikmâle ta‘ahhüd eylediğinde ta‘ahhüd ve tasdîkleri İstanbul Mahkemesi’nden huzûr [-ı âlîlerine i‘lâm olundu.] Fî 3 C sene 1237