İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 276 Hüküm no: 252 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Karabet’in oda gediğini Artin v. Tobrat’a sattığı Oda gediği bey‘i 6.000 guruş Mukābele şüd Ma‘rûz[-ı dâ‘î-i devlet-i aliyyeleridir ki] Medîne-i Üsküdar’da Selâmiye Mahallesi’nde Karakethüdâ bahçesi nâm mahalde mütemekkin Mihail v. Merkeryos nâm zimmî İstanbul mahkemesinde meclis-i şer‘-i enverde Artin v. Tobrat nâm zimmînin oğlu ve tarafından husûs-ı âtîde tasdîka vekîl-i müseccel-i şer‘îsi Karabet nâm zimmî muvâcehesinde Asvador v. diğer Karabet nâm zimmî hâzır olduğu hâlde mahmiye-i İstanbul’da mûytâblar sûkunda vâki‘ Kebabcı Hanı derûnunda kâin ma‘lûmü’l-hudûd bir bâb oda derûnunda mevcûde beyne’l-hiref gedik tâ‘bir olunur eşya ve âlât-ı lâzıme-i ma‘lûme başmuhâsebe kaleminde mukayyed ve mu‘teber gedik olarak bin iki yüz on yedi senesi Rebî‘ülevvelinin yirmi dokuzuncu günü târihiyle müverrah işbu yedimde olan bir kıt‘a sûret mantûkunca hâzır-ı mersûm Asvador zimmînin mukaddemâ yedinde mâlı ve mülkü iken sene-i mezbûre şehr-i Ramazani’l-mübârekinin on dördüncü günü tarihiyle müvverrah ve ol tarihte mahmiye-i mezbûrede Mahmud Paşa mahkemesi nâibi olan merhûm Hafîdzâde Mehmed Said Efendi’nin imzâ ve hatmini hâviye bir kıt‘a hüccet-i şer‘iyye mûcebince mesfûr Asvador zimmî zikr olunan gedik âlâtını semen-i ma‘lûm ve makbûza bâtten ve sahîhan bana bey‘ ve temlîk ben dahi iştirâ ve kabz edip tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve iskāt dahi etmemizle ol vechile hâzır-ı mersûmun kat‘â alâka ve medhali kalmayup sâlifü’z-zikr gedik âlâtı târih-i sani-i merkūmdan akd-i âti’z-zikrin sudûruna değin yedimde mâlım ve mülküm olmağla ben zikr olunan oda derûnunda mevcûde ber-vech-i meşrûh şirâen mâlik olduğum gedik âlât-ı lâzıme-i ma‘lûme-i mezkûremi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin altı bin guruş semen-i medfû‘ ve makbûza müvekkil-i mersûm Artin zimmîye bey‘ ve temlîk ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi edüp fîmâ ba‘d sâlifü’l-beyân gedik âlât-ı lâzıme-i ma‘lûmesinde benim dahi kat‘â alâka ve medhalim kalmayup müvekkil-i mersûm Artin zimmînin mâl-ı müşterâsı ve hakk-ı sırfı olmuşdur deyü eylediği ikrâr u i‘tirâfını vekîl-i mesfûr Karabet zimmî ile hâzır-ı mersûm Asvador zimmî ba‘de’t-tasdîk zikr olunan oda gediğinin bâyi‘-i evveli olan hâzır-ı mesfûr Asvador zimmînin üzerinde olan kayd-ı atîki ref‘ ve terkīn ve yedimde olan sûret battâlda hıfz olunup ikrâr ve tasdîkleri mûcebince müşteri-i sâni olan müvekkil-i mesfûr Artin zimmî ismine kayd ile müceddeden sûret i‘tâ buyrulmak bâbında vekîl-i mersûm Karabet zimmî istid‘â-yı inâyet etmekle ol bâbda fermân-ı âlîleri sudûru iktizâ eylediği mahkeme-i mezbûreden huzûr [-ı âlîlerine i‘lâm olundu.] Fî 12 C sene 1237