Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 304 Hüküm no: 324 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki Efendi b. Abdurrahman’a zeâmet bedeli olarak peşin verdiği paranın zeâmetin başkasına havale edilmesi sebebiyle iade edilmesi gerektiği Zümre-i kuzât bâ‘isü hâze’l-kitâb Abdülbâkī Efendi b. Abdurrahman meclis-i şer‘-i şerîf-i enverde sâbıkan turnacıbaşı olup vefât eden İbrahim Ağa’nın dâmâdı Kasım Ağa b. Mustafa nâm kimesne mahzarında üzerine da‘vâ ve takrîr-i kelâm edip mezbûr Kasım Ağa bin doksan altı senesine mahsûb olmak üzre Ali Ağa nâm kimesne berât-ı şerîf-i âlîşânla mutasarrıf olduğu vilâyet-i Anadolu’da Gümüş kazâsına tâbi‘ Güvendi ve tevâbi‘i karyelerini Ağa-yı mezkûrûn iltizâmından olup kendi vekîli olmak üzre yüz on beş guruş bana ilzâm, ben dahi iltizâm ve meblağ-ı mezbûru mezkûr Kasım Ağa’ya teslîm eylediğimden sonra mezbûr Ali Ağa ze‘âmet-i mezkûreyi âhara iltizâm ve yedine zabıt temessükü verilmekle bana zabtı müyesser olmamağla hâlâ mezbûr Kasım Ağa’ya suâl olunup ber vech-i peşîn makbûzu olan meblağ-ı mezbûru bana red ve teslîme tenbîh olunmak matlûbumdur dedikde gıbbe’s-suâl mezbûr Kasım Ağa cevâbında fi’l-hakīka bâlâda şerh [ve] beyân ve tafsîl ve ayân olunan Güvendi ve tevâbi‘i karyelerini Ağa-yı mezkûrûn sene-i mezbûrede iltizâmı olup kendi vekîl olmak üzre on beş guruş mezkûr Abdülbâkī Efendi’yi ilzâm ve meblağ-ı mezbûru ber vech-i peşîn kabz eylediğimden sonra mezkûr Ali Ağa ze‘âmet-i mezbûreyi âhara der-uhde etmekle meblağ-ı mezkûru red ve teslîm lâzım geldiğini ikrâr ve i‘tirâf etmeğin alâ mûcebi i‘tirâfihî meblağ-ı mezbûru müdde‘î-i mezkûra red ve teslîme merkūm Kasım Ağa’ya tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Abdurrahman, el-Hâc Mustafa [b.] Tevekkül, Mehmed b. İdris.