Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 305 Hüküm no: 325 Orijinal metin no: [50a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mansur’un oğlunu kürekten kurtarmak için para verdiği iddiasını ispat edemediği Şâm-ı şerîf kazâsı müzâfâtından Havran nâhiyesine tâbi‘ Şeyh Sa‘d nâm karye ahâlîsinden olup hâlâ mahrûse-i Galata’ya tâbi‘ kasaba-i Kasımpaşa’da Tahtakadı mahallesinde müsâfiren sâkin olan Fâtıma bt. Mansur nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde mahalle-i mezbûre sükkânından işbu bâ‘isü’l-kitâb Mısırlı el-Hâc Selim b. Ebû Zeyd mahzarında üzerine da‘vâ ve takrîr-i kelâm edip mezbûr el-Hâc Selim’e târih-i kitâbdan üç ay mukaddem Tersâne-i âmire zindanında mahbûs olan sadrî oğlum Mehmed’i kürekden tahlîs için nakid altmış esedî guruşumu ve mecmû‘u seksen guruş kıymetli on aded sîm hazme [halîka?] ve iki sîm bileziğimi def‘ ve teslîm mezbûr el-Hâc Selim dahi ahz u kabz edip lâkin mezbûr Mehmed’i tahlîs mümkün olmayıp elân kürekde kalmağın hâlâ mezbûr el-Hâc Selim’e suâl olunup meblağ-ı mezbûr ile merkūmeyi bana red ve teslîme tenbîh olunmak matlûbumdur dedikde gıbbe’s-suâl ve akībe’l-inkâr, müdde‘iye-i mezbûreden sıdk-ı makāline mutâbık beyyine taleb olundukda isbât-ı beyyineden izhâr-ı acz ile istihlâf etmeğin fi’l-hakīka târih-i mezbûrda meblağ-ı mezbûr nakid altmış guruş ve zikr olunan sîm halîka ve iki sîm bilezik müdde‘iye-i mezbûre Fâtıma’dan ber vech-i muharrer ahz u kabz etmeyip üzerine şer‘an redd-i zamândan bir nesne lâzım gelmediğine mezbûr el-Hâc Selim’e yemîn teklîf olundukda ol dahi [alâ] vefki’l-mes’ûl yemîn billâhi’l-a‘lâ etmeğin mûcebince müdde‘iye-i merkūme Fâtıma bilâ-beyyine ber vech-i mübeyyen mu‘ârazadan men‘ olunup mâ hüve’l-vâki‘ bi’t-taleb ketb ve imlâ olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Eş-Şeyh Mehmed b. Mansur Birâdereş, Mehmed Efendi b. ( ) el-Müezzin, el-Hâc Hasan b. Nasuh, el-Hâc Şaban b. Sâlih, İbrahim Çelebi b. Ahmed, el-Hâc Mustafa b. Tevekkül.